Nukus-nukos sa bonus
Walo ka tuig ang nilabay, dihang wa pa magsige og bakasyon ang mayor ug wa pa hingpit nga magkayamukat ang pagduma sa syudad, giaprobahan sa Cebu City Council ang gipangayo ni Mayor Mike Rama nga ?30,000 nga Christmas bonus para sa tanang trabahante sa City Hall.
Pero upat ka konsehal nipahibawo atol sa special session nga nigahin og kuwarta para sa bonus nga di sila modawat sa kinatibuk-ang kantidad. Kay para nila dako ra ug di makiangayon para sa mga Sugbuanon, ug nagtimaan og kakuwang og kaikog sa lokal nga mga opisyal, ang paggasto sa buhis para sa sobrang bonus.
* * *
Ang upat ka konsehal nga nibalibad sa ?30,000 nga bonus niadtong 2015 mao silang Alvin Dizon, Margot Osmeña, Lea Japson, ug Mary Ann de los Santos. Matod ni Dizon dako ra ang ?120 milyones para sa bonus sa 4,900 ka kawani ug opisyal sa City Hall.
Ang sentimento nilang Dizon, Osmeña, Japson, ug De los Santos tulo ka termino ang nilabay nagpabiling balido ug makiangayon. Labi na atubangan sa pag-insistir ni Rama og mas dakong bonus.
* * *
Samtang gilalisan pa nilang Rama ug sa iyang alyadong mga konsehal kon pila ang bonus --?35,000 ba suma sa gusto ni Rama o ?20,000 ba nga maoy giaprobahan sa konseho-- wa koy nadunggan nga konsehal nga nipadayag og panagana sa pagdawat sa dakong kuwarta atubangan sa kalisod sa kinabag-an sa mga magbubuhis.
Labi na nga ang mas dakong budget nga nakuha ni Rama karong tuiga, gawas nga napakyas pagsulbad, nipasamot sa baha ug ubang mga problema.
* * *
Ug pagdason sa ka way klaro sa liderato ni Rama, mahimong wa g’yud hinuoy madawat ang mga trabahante sa City Hall sa di pa ang Pasko karong Lunes:
• Nipasalig ang City Treasurer’s Office nga maandam na karong adlawa, Disyembre 22, ang pundo pinasikad sa supplemental budget para sa ?20,000 nga bonus sa kada trabahante nga naaprobahan sa konseho niadtong Disyembre 13; pero
• Ang pag-awhag ni Rama sa mas dakong bonus mahimong mapagawas human na sa Pasko o, kay wa may klaro kinsa ang magdala og buot sa mga konsehal ug sa mayor, liwas sa bag-ong tuig.
- Latest
