Pataka nga pagsibya

Taas nang lista sa bakak nga kasayuran ug mga pasangil nga gisibya sa SMNI, ang TV network ni Apollo Quiboloy, pero wa aksiyoni sa mga ahensiya sa gobyerno. Pipila sa mga biktima sa ilang iresponsableng mga magsisibya:

•Maria Ressa, CEO sa Rappler, nga ilang gipasanginlan nga nihatag og plataporma sa Communist Party of the Philippines (CPP);

•Kanhi bise presidente Leni Robredo nga gipasanginlan nga nakigkonsabo sa CPP kay gisuportahan siya sa Makabayan bloc;

•Senador Risa Hontiveros gipasanginlan nga hilaw nga komunista;

***

•Atom Araullo ug iyang inahan nga si Carol Araullo nga gipasanginlang mga sakop sa New People’s Army (NPA);

•University of the Philippines (UP) Cebu Chancellor Leo Malagar ug iyang asawa nga si Manila Regional Trial Court Branch 19 Judge Marlo Magdoza Malagar nga gipasanginlang mga sakop sa NPA;

•Baguio City Mayor Benjamin Magalong nga gipasanginlang nakigkosabo sa mga rebeldeng komunista tungod sa iyang pagpatangtang sa tarpaulins sa National Task Force to End Local Communist Armed Conflict (NTF-ELCAC); ug

•Gabriela, Kabataan ug ACT party-list groups ug National Union of People’s Lawyers (NUPL) gipasanginlan nga mga terorista.

***

Ang pangiyugpos sa gobyerno sa nangaging katuigan kalit nga naputol dihang gisaway sa SMNI si House Speaker Martin Romualdez. Gi-imbestigar dayon sa House Committee on legislative franchises ang anchor nga nipasangil nga niabot og ?1.8 bilyones ang gasto sa mga biyahe sa ig-agaw ni Presidente Ferdinand Marcos Jr.

Labing nakugang ang SMNI. Klarong nabag-ohan nga gisukit-sukit sa Kongreso. Nagpakitabang sa mga sakop sa media, nga kasagaran ilang gipasanginlang komunista ug terorista, sa pagpanalipod sa kagawasan sa prinsa.

***

Laing timaan nga niabot nang adlaw sa panudya sa SMNI: Giawhag sa mga kongresista ang National Telecommunications Commission (NTC) sa pagsuspenso sa operasyon sa SMNI samtang gitun-an pa sa komitiba ang mga silot nga ikapahamtang batok sa kompaniya, apil na ang posibleng pagkanselar sa ilang prangkisa.

Mas kuyawan ang SMNI kay ang nangu sa mga mopahilom nila mao si Kongresista Margarita Nograles, nga gawas nga taga Davao pag-umangkon g’yud ni kanhi presidente Rodrigo Duterte. Kon ang kinakusgan nga tigdupa ni Quiboloy di nang kabadlong sa iyang mga paryente sa Kongreso, kinsa na man lang ang mobarug sa pagpanalipod nila?