Nganong bilib sila

Posibleng rason nganong bilib silang Bise Presidente Sara Duterte Carpio ug Senador Imee Marcos sa atong mga korte mao ang ilang kaugalingong kasinatian, pulos sila wa madutli sa balaod:

• Si Carpio wa mapriso, ni ma-disbar, sa iyang pagkulata ni court sheriff Abe Andres sa Davao City niadtong 2011, bisan pa nga ang krimen na-dokumento sa mga kamera, nasibya sa nasudnong telebisyon ug makita sa social media platforms; samtang

• Si Marcos wa masiloti bisan napamatud-an sa korte sa Hawaii nga maoy responsable sa pagpatay sa aktibistang si Archimedes Trajano niadtong 1977.

***

Si Andres, imbes mokiha ni Carpio human na-ospital sa iyang mga bun-og, nagtagu-tago ug nilayas g’yud gani gikan sa Davao uban sa iyang pamilya. Tungod sa grabeng kahadlok nga wa siyay dag-anan, wa siya mokiha ni Carpio.

Pero nipunit sa iyang kawsa sa Sheriffs Confederation of the Philippines (SCOPHIL). Kinsa nipasaka og mga kasong kriminal ug administratiba batok ni Carpio. Gibasura sa Ombudsman ang kasong kriminal tungod sa pagtalaw ni Andres. Ug naabtan og dul-an sa tuig una nahukman ang kasong administratiba: Nipahamtang lang og reprimand batok ni Carpio.

***

Si Trajano gidakop, gi-torture ug gipatay human nangutana ni Marcos atol sa open forum sa Pamantasan ng Lungsod ng Maynila 46 ka tuig ang nilabay kon matudlo ba siyang national chairperson sa Kabataang Barangay kon di pa siya anak sa presidente.

Human napalayas sa Malacañang niadtong 1986, nakonbikto si Marcos sa Hawaii ug gipabayad og $4.16 milyones (?231 milyones). Wa kadawat og bisan usa ka dako ang mga Trajano hangtod karon.

***

Ang duha ka kaso abundang sukaranan sa bilib nilang Carpio ug Marcos sa sistema sa atong hustisya. Pun-an pa sa paglingkawas ni kanhi presidente Rodrigo Duterte og responsibilidad sa kamatayon sa 30,000 ka biktima sa extrajudicial killings sa sa kampanya sa drugas. Ug sa padayong paglusot sa mga Marcos sa ilang ill-gotten wealth cases.

Kinsa man tuod ang ganahan nga mopasud sa mga imbestigador sa International Criminal Court (ICC)? Si Carpio apil sa lista sa mga gi-imbestigar sa ICC sa mas unang pinatyanay sa Davao. Ug si Marcos, bisan way apil sa ICC, nagpadayon sa iyang papel sa pag-ulug-ulog sa mga Duterte.