Tambag batok sa paukyab
Kon si Presidente Ferdinand Marcos Jr. wa pa lang nagbadlis-badlis sa papel pagbunal og price ceiling sa bugas humay, di unta mahinayon ang kinadak-ang krisis sa iyang administrasyon. Kay bisan iyang mga alyado nipasidaan nga tungod sa iyang pataka peligrong magnihit ug mosamot kamahal ang bugas humay.
Kon nangonsulta pa lang si Marcos sa mga tinuod nga kamao, nga wa mahitabo kay wa man pakita sa iyang opisina sa Department of Agriculture sa niaging unom ka buwan, natambagan unta nga di mada og paukyab ang mga problema nga siya ray nagmugna.
* * *
Usa sa iya untang makonsulta, kay maoy labing suhito sa industriya sa bugas humay, mao ang kanhi nasudnong presidente sa Grains Retailers Confederation (Grecon) nga si Mayor Nene Alegado sa Consolacion sa amihanang Sugbo.
Si Alegado maoy kinaham nga resource person sa nangaging mga liderato sa Malacañang ug Kongreso sa mga higayon nga may problema sa bugas. Kay di siya kutob lang sa istorya kon dili aktuwal nga nagnegosyo og bugas humay. Ug, kay politiko, kamao siyang mohan-ay sa mga mensahe nga masabtan sa mga nagtungkawo sa gahom.
* * *
Duha ka tambag ni Alegado ni kanhi presidente Gloria Macapagal Arroyo 15 ka tuig ang nilabay mahimong mapuslanon ni Marcos karon:
Ang pagpangronda sa mga bodega makapugos sa lehitimong mga negosyante paghunong sa pagpamaligya ug mopagrabe sa kanihit sa bugas humay; ug
Ang angayng bantayan mao ang mga tag-iya sa higanteng mga galingan ug tigkompra sa mga tipasi kay sila ang tinuod nga nagmaniobra sa suplay ug presyo sa bugas humay.
* * *
May pasidaan si Alegado niadtong 2015 nga makatabang ni Marcos pag-alkontra sa maniobra sa price ceiling nga ?41 kada kilo sa regular-milled rice ug ?45 kada kilo sa well-milled rice: Mga galingan mahimong mopagawas lang og fancy rice, nga mapresyohan nila bisan pila, aron moburot pang ilang ginansiya.
Magpatambag man o dili, si Marcos angayng mangita og daghang paracetamol. Kay higanteng labad sa ulo ang iyang gituyoan sa pagpanghilabot sa negosyo sa bugas humay. Di hinuon mabasol kon kumbinsido nga makalingkawas pinaagi sa laing paukyab. Kay nakakumbinser og 31 milyones ka botante sa niaging eleksiyon ang Tallano gold ug ?20 nga bugas humay.
- Latest
