Bugti sa dakong gasto
Puwerteng dakoa sa gasto sa mga magbubuhis para ni Bise Presidente Sara Duterte Carpio sa unang unom ka buwan niya sa puwesto gikan sa Hunyo 30 hangtod sa Disyembre 31 sa niaging tuig:
•Gipaburot ang mga trabahante sa iyang opisina ngadto sa 683 (labaw og 28% sa 535 ni kanhi Bise Presidente Leni Robredo);
•Mas gipaburot ang iyang security personnel ngadto sa 433 (labaw og 455% sa 78 ni Robredo); ug
•Nigasto og ?125 milyones sa kataposang 19 ka adlaw sa tuig (Disyembre 13-31), o ?7 milyones kada adlaw.
* * *
Labihang daghana sa security personnel ni Carpio nga:
•67 na lay kuwang ug mahimo nang usa ka batalyon;
•250 na lay trabahante ni Carpio nga di security personnel;
•Kon bantayan silang Carpio ug iyang mga trabahante, mahimong magtagsa og guwardiya nga duna pay 183 nga mahibilin nga way laing tan-awon gawas ni Carpio;
•Kon para sa pamilya ni Carpio, mahimong tag-50 ang guwardiya sa iyang bana nga si Mans ug tulo ka anak nga silang Sharky, Stingray, ug Stonefish ug duna pay mahibilin nga 233 nga magsige og tutok ni Carpio.
* * *
Mga eksperto niluwat sa mosunod nga mga tambag pagsulbad sa insecurity: Pag-ila sa gamot nga hinungdan sa mga kahadlok; paghagit sa negatibong mga panghunahuna, pagsentro sa atensiyon sa kinakusgang aspeto sa kaugalingon, pagtakda og makab-ot nga katuyoan, palibot sa mga tawo nga makapadasig nimo, pag-atiman sa imong panglawas ug panghunahuna, pagdangop og propesyonal nga tabang sa usa ka therapist.
Pero wa sila paminawa ni Carpio: Mga magbubuhis maoy gipagasto aron makabatyag og pagsalig sa kaugalingon.
* * *
Gawas sa 433 ka security personnel, ambot wa ba madugangi karong tuiga, nakakuha si Carpio og ?650 milyones nga confidential funds. Palihug hukmi kon nabugtian ba sa iyang mga nahimo:
•Gipa-apil niya ang toothbrush drill sa curriculum sa mga estudyante aron pagpalambo sa kalidad sa edukasyon;
•Gipatangtang ang tanang visual aids gikan sa mga bungbong sa classrooms aron makatingob ang mga bata sa ilang atensiyon sa leksiyon sa mga magtutudlo; ug
•Dihang gipangutana parte sa Public Wifi Program atol sa pagtuki sa Kongreso sa budget sa Department of Education, nagkabunga-bunga, nikatawa ug nisugo sa iyang undersecretary sa pagtubag.
- Latest
