Ila pa karon
Kaluoy sa tulo ka biktima. Tungod sa pagkabisto sa pagpanghasi, pagpangulata ug pagpakauwaw nga ilang nahiagoman, daghan ang nidapig nila. Dunay nitanyag og suporta. Dunay mga abogado nga nitanyag sa libre nilang serbisyo. Dunay mga politiko nga nipasalig og proteksiyon kon mopasaka sila og kaso.
Pero ang unang duha nitago human nakadawat og hudlat nga di sila buhion ug bawosan ang tibuok nilang pamilya kon mokiha. Bisan giunsa og kumbinser, gipalabi ang kahadlok sa ilang seguridad. Ang ikatulo wa magpakahilom. Pero nipili sa pagtila sa lapalapa sa gipasanginlang nagpakauwaw niya.
* * *
Siklista ang unang biktima. Naka-engkuwentro siya sa trapiko og kanhi polis. Nga nibunot sa armas ug nidapog niya. Kinse anyos nga lalaki ang ikaduhang biktima. Gikulata sa kapolisan tungod sa pagduda nga nangawat og cellphone. Pulos nakadawat og hulga maong wa na moatubang sa mga imbestigador.
Mao ni subo nga hulagway sa atong sistema sa hustisya. Ang mga biktima nagtuo nga makaangkon og mas dakong kadaot kon modangop sa mga korte. Nga way si bisan kinsa nga makapanalipod nila kon mangahas sa pagbarug sa mga nag-abuso sa ilang uniporme.
* * *
Ang ikatulong biktima niisip sa iyang kaugalingon nga mayukmok. Nga way dag-anan sa higante nga nasuko niya. Bisan gipasanginlan siya og lang-og nga krimen atubangan sa publiko, bisan gisakitan pag-ayo ang mga sakop sa pamilya, nipili sa pagpakiluoy.
Mao ni pait nga dagway sa atong katilingban. Ang mga gagmay kumbinsido nga di sila angay nga mangahas sa pagpanalipod sa gipanamastamasan nilang mga katungod. Nga ang bugtong nilang mahimo mao ang pagpangayo og pasaylo.
* * *
Mao nga di ta angay nga mahibung sa grabeng pahimus sa mga nagtungkawo sa gahom. Kinawatay nga morang way ugma. Pagpanligis ni bisan kinsang nakahasol sa ilang agianan. Pagbun-og, imbes pag-imbestigar, sa gidudahang kawatan. Ug pag-insulto ni bisan kinsang wa katagbaw sa ilang gipaabot.
Ang katawhan nakakita sa inadlawng pangabuso. Ang mga biktima nabulilyaso. Ang mga abusado niburot pag-ayo. Nagtuo nga inutil sila sa pagbadlong sa kahiwian. Nga pabahaan lang sila og kuwarta sa umaabot nga eleksiyon ug malumos nang mga yangungo. Magpadayon ang panaugdaog. Hangtod nga mapuno ang kinabag-an. Ug makaamgo nga kon magkahiusa mas hawod pa kay sa mga way puangod.
- Latest
