Pamunoang bakakon
Namakak si Presidente Ferdinand Marcos Jr. parte sa ekonomiya atol sa ikaduha niyang State of the Nation Address (SONA). Sama nga namakak siya sa diskurso atubangan sa iyang mga dumadapig sa Sugbo niadtong Mayo nga ang Pilipinas ang kinapaspasan og tubo sa tibuok kalibotan. Nga gidasonan sa iyang ig-agaw nga si House Speaker Martin Romualdez isip kabahin sa paukyab sa SONA.
Sa SONA niadtong Lunes, gikurhian ni Marcos ang iyang pamakak dinhi sa Sugbo. Pero gipulihan og laing bakak. Nga ang pagtubo sa ekonomiya maoy kinadak-an sa 46 ka tuig.
* * *
Sakto ang numero sa presidente: Nitubo ang nasudnong ekonomiya og 7.6% sa 2022. Pero kuwang ang iyang detalye. Wa niya isulti nga nagpabilin pa ang Pilipinas sa lawom nga gahong nga atong nahulgan atol sa pandemya.
Salamat sa pataka nga pagdumala ni kanhi Presidente Rodrigo Duterte sa COVID-19. Wa lang nihagsa, nihiyos g’yud ang ekonomiya og 9.5% sa 2020. Sa tinamban nga pagkasulti, kinahanglang motubo ang ekonomiya og 9.5% una makabawi. Pero segun sa mga ekonomista kinahanglan tang motubo og 9.4% kada tuig una mabalik ang ekonomiya sa wa pay pandemya unya sa 2028.
* * *
Ang atraso ni Duterte mao nga wa siya kasabot unsay lockdown, sama nga wa siya kasabot sa COVID-19 (di na kasud kay init ang Pilipinas), ni sa minimum health protocols (face mask angayng labhan og gasolina).
Imbes palambuon ang mga ospital ug dugangan ang healthcare workers ug mga tambal atol sa lockdown, gitutokan ang pagdakop sa nanggawas sa kabalayan ug nanglapas sa checkpoints. Maong paglibkas sa lockdown, mas nisulbong ang tinakdanay.
* * *
Kay kurog man sa mga Duterte, di siyang kaduot sa niaging administrasyon. Di makahisgot sa pataka sa ekonomiya (ug laktod nga pinatyanay). Pero makapaburot sa mga nahimo (ug pag-angkon bisan sa wa mahimo) sa iyang unang tuig. Ug, nakatag-an ka, makalubag sa mga numero.
Ka wa natoy dag-anan. Mapul-an tag bantay kanus-a sunod nga bakakan sa presidente. Isip pangulo sa nasud, siya unta ang manimon sa katawhan ngadto sa mas hayag nga ugma. Pero mao na man hinuon ang kinadak-an nga ahente sa kangiob, sa pangilad, ug sa lipat-lipat.
- Latest
