Pangape taliwa sa mga libaong
Ambot unsay nasulod sa iyang ulo, usa ka batan-ong negosyante, gikang nakigtagbo sa bag-o niyang mga kasosyo sa Dumaguete City, ug nahasol pag-ayo sa busluton nga kadalanan sa habagatang Sugbo, nga nipasigarbo sa kamalambuon sa turismo, gilabyan niya ang nanguhong nga resorts ug restaurants, ug nipili paghunong sa barung-barong nga tindahan, aron mangape.
Gikan sa daan nga termos ang init nga tubig nga gibubo sa nag-ukul-ukol nang 3-in-1. Kaulbuhon nang iyang kaspa. Pero nakaamgo sa bulilyaso nga iyang tinuyoan. Unsa may iyang gipaabot? Specialty coffee sa kinataliwad-an sa mga libaong?
* * *
Niginhawa siya og lawom. Nangayo og laing 3-in-1 sa tinderang hamtong. Kinsa nanlipaghong sa kauwaw pagkakita sa nagburutburot nga kape. Nangayo og pasaylo nga daan ang nahatag. Kay wa pa ikabitay ang mga bag-ong napalit sa dakong tindahan sa silingang lungsod.
Gawas nga gitimplahan og mas humot nga kape, gipakapinan og init nga bingka ug empanada nga naapil sa kompra. Gipasaligan sab nga di pabayron. Gani, kon wa siya magdali, mahimo bang mosawo sa paniudto sa iyang pamilya sa ilang balay luyo sa tindahan, kay birthday sa ilang kamanghoran?
* * *
Wa tuyoa sa negosyante ang pagpahiyom. Ug pagdawat sa imbitasyon. Iyang nakaila ang tibuok pamilya. Ang bana sakop sa grupong nipasakay sa ilang mga bangka sa mga turista nga nadani sa higanteng mga tuki. Ang tulo ka gagmayng anak nagtungha sa eskuylahan sa Poblacion.
Puwerteng lipaya sa pamilya kay iyang gibilin ang tibuok karton sa mga sinugatan --piaya, barquillos, biscocho, ug napoleons-- nga gipabawon sa iyang mga kasosyo. Nagmaya sang mga bata nga gibinlan sa mga duwaan sa iyang anak nga nagpasad sa sakyanan.
* * *
Kinsa may nigiya niya paghapit sa tindahan? Kinsa may nikumbinser niya sa pagpangape sa udtong tutok? Kinsa may nipugong sa iyang sapot ug nigakot sa iyang baba nga andam na untang mangasaba?
Nakahukom siyang suguon ang iyang sekretarya paghangyo sa tindera isip resource person sa proyekto sa kompaniya pagpanghatag og puhonan ug pagtudlo unsaon pagpamaligya nga di mahurot ang halin sa pagpanukli. Kalit lang nihapsay ang iyang biyahe. Pero kumbinsido gihapon nga mas dinalian ang panginahanglan pagtapak sa mga libaong kay sa paggasto og ?50 milyones para sa rebranding.
- Latest
