Live, Love, Lebanon
Usa sa mga pasangil batok ni Tourism Secretary Christina Frasco, human niya gilusad ang “Love the Philippines” ug sa wa pa masakpi nga di gikan sa Pilipinas ang pipila sa footage nga gigamit sa campaign video, mao nga ang bag-ong slogan sa turismo susama sa iyang “LiveLoveLiloan” paglingkod pagka mayor sa amihanang lungsod sa Sugbo.
Laing pasangil mao nga nangopya lang sila sa “Love Barbados” nga gilusad sa 2019 ug sa “Love Cyprus” sa 2021. Tungod sa napukaw nga interes sa lista sa tourism slogans sa ubang kanasuran, nahibaw-an sab nga mas una pa g’yung gilusad ang “Live, Love, Lebanon.”
* * *
Unang nikatap ang “LiveLoveLiloan” sa 2016, pagsugod sa unang termino ni Frasco pagka mayor sa Liloan. Gisugdan ang “Live Love Lebanon” tourism campaign niadtong 2012 ni Youmna Chamcham, usa ka Lebanese-American designer.
Gisagop sa Ministry of Tourism sa Lebanon ang kampanya ug gilusad niadtong Abril 2014 isip “Live, Love, Lebanon.” Gikontrata ang advertising agency nga M&C Saatchi pagpakita sa katahom sa Lebanon, sukwahi sa nabalita nga pat-ak nga kaguliyang.
* * *
Ambot kinsay nakapahibawo ni Frasco sa slogan nga haom sa Liloan. O kon unsa nga bersiyon sa slogan ang una nilang nadunggan. Kay human sa Lebanon, nitumaw sab ang Live Love Los Angeles, Live Love Spain, Live Love Saudi, Live Love Dubai, Live Love Beijing, Live Love Baghdad, ug Live Love Chiang Mai.
356 na ka lugar sa kalibotan ang nigakos sa kampanya. Nga gawas sa turismo nigakos sa kawsa nga ang gugma mao ang labing gamhanan nga puwersa sa kausaban sa kalibotan.
* * *
Dihang nihagsa ang ekonomiya sa Lebanon, gisamotan sa pandemya sa COVID-19 ug pag-ulbo sa pantalan sa ilang ulohang Beirut nga nipatay og 215 ug nigusbat sa dakong bahin sa syudad, gilusad sa Lebanon sa 2021 ang slogan nga “I love you in your madness” (o “Crazy Love”). Gidasig ang mga turista paghangop sa tanang kakulian sa nasud.
Sa Hulyo sa niaging tuig, gilusad nila ang laing kampanya nga “Welcome to Lebanon” (Ahla Bhal Talleh). Nga gipasikad pagbalik sa mas malampuson nga “Live Love Lebanon.” Ambot unsa kamalampuson ang turismo sa Lebanon. Pero dunay taga Sugbo nga nahigugma sa ilang slogan.
- Latest
