Kiat sa politika taliwa sa kalisod

Ang kainutil sa administrasyon ni Presidente Ferdinand Marcos Jr. pagbadlong sa pagsulbong sa presyo sa mga palaliton, nga gidudahan nga gimaniobra sa kaso sa asukar ug sibuyas, nalabwan lang sa kiat sa iyang mga alyado sa politika taliwa sa nagkagrabe nga kalisod sa katawhan.

Imbes sulbad sa ilang kalisod, ang nakuha sa mga pamilya nga labing naapiki sa krisis mao ang taphaw nga mga pasalig nga palambuon ang ilang kahimtang. Gipakapinan pa og ulug-ulog nga padayon silang motrabaho bisan sa politikanhong mga maniobra. Nga, nakatag-an ka, sila ra say nagpasiugda.

* * *

Kinsa man ang kalit lang ni-demote ni kanhi Presidente Gloria Macapagal Arroyo gikan sa pagka senior deputy speaker sa House of Representatives ngadto sa pagka ordinaryo nga deputy speaker? Way lain. Kon dili si House Speaker Martin Romualdez. Kinsa way kaisog sa pagpasabot sa iyang gihimo.

Gawas sa pagpahiyos sa iyang pagpakauwaw ni Arroyo. Pinaagi sa pagsugo sa iyang mga turutot sa pagpasabot nga gusto lang nilang palingkawason si Arroyo sa daghan niyang trabaho. Bisan way dugang trabaho ni responsibilidad, kay lunlon ra nga titulo, ang pagka senior deputy speaker.

* * *

Si Arroyo nay nipasabot. Nga gidudahan siyang nagplano paglusad og kudeta batok ni Romualdez. Sama sa iyang pagpalagpot ni kanhi House Speaker Pantaleon Alvarez niadtong 2018. Uban sa tabang nilang kanhi Davao City Mayor (karon Bise Presidente) Sara Duterte Carpio ug kanhi Ilocos Norte Governor (karon Senador) Imee Marcos.

Pero si Arroyo wa mohingan sa nipasangil niya. Nakigkuptanay hinuon og kamot ni Romualdez. Human ni-amen niya dayong pagpa-hurar sa kongresista nga gipili puli sa iyang kanhi puwesto.

* * *

Si Carpio ni-resign sa Lakas-CMD pinaagi sa pagbasol sa political power play nga gihulagway niyang, palihug panggunit sa lingkoranan, execrable. Nga kon imong i-Google dunay mas yanong synonyms: awful, deplorable, disgusting, hateful, heinous, offensive, ug revolting. Ganahan lang tingali siya, o ang iyang ghost writer, nga ilhong mas lawom.

Pero way nihatag og importansiya sa iyang gihimo. Si Marcos nipasalig nga magpabilin sila nga BFF. Mga alyado, nga nikuyog niya pagpasakop sa Lakas-CMD sa niaging eleksiyon, wa mobiya sa partido. Ug ang PDP-Laban, ang partido nga gikawat sa iyang amahan gikan sa mga Pimentel, nakig-alyansa sa partido nga iyang gibalikas.