Pagpaburot sa media empire
34 ka adlaw. Mao na ang gintang sa pagtabang ni House Speaker Martin Romualdez pagpatay sa labing dako nga media network sa nasud. Ug sa iyang pagpalapad sa prangkisa sa iyang kaugalingong mga sibyaanan sa radyo ug telebisyon. Gikan sa iyang pinuy-anan sa Tacloban City ngadto na sa tibuok nasud.
Ingon ana siya ka-apurado. Wa niya palabyang usa ka tuig. O pila ka buwan. Gigamit ang dako niyang puwesto sa House of Representatives. Pagpahilom sa labing gamhanan nga network sa radyo ug telebisyon sa nasud. Aron pagpatubo sa iyang negosyo.
* * *
Apil si Romualdez ug Sugbuanon niyang asawa nga si Kongresista Yedda Marie Romualdez sa 70 ka kongresista nga nibasura sa aplikasyon paglugway sa prangkisa sa ABS-CBN. Gisalikway nilang tanang pasalig sa mga ahensiya sa gobyerno --BIR, SEC, DOLE, ug uban pa-- nga way balaod nga nalapas ang ABS-CBN.
Gipili nilang Romualdez ang buta nga pagtuo sa wa mapamatud-ing mga pasangil sa mga turutot ni kanhi presidente Rodrigo Duterte. Salamat sa ilang pag-abuso sa gahom, napugos pagpawong ang ABS-CBN sa ilang frequencies sa radyo ug telebisyon sa tibuok nasud niadtong Mayo 5, 2020.
* * *
Atubangan sa pagbangotan sa minilyon nga nagsalig sa ABS-CBN sa ilang inadlawng balita ug kalingawan, si Romualdez wa mag-usik og panahon. Gipahimuslan dayon ang ilang gimugna nga dakong haw-ang sa industriya sa media.
Human lang sa usa ka buwan, pagka Hunyo 8, 2020, gipasar ang House Bill 6042 nga si Romualdez ang nagpasiugda isip majority leader. Nga nihatag og 25 ka tuig nga prangkisa pag-operate og nationwide television ug radio network sa iyang gipanag-iya nga Philippine Collective Media Corporation (PCMC).
* * *
Wa pa mahuman si Romualdez paghawan sa agianan sa paglambo sa iyang negosyo. Uban niya isip House speaker, gihudlat sa mga kongresista sa pagpawong sab sa TV5 ni Manny Pangilinan kon dayunon ang ?2 bilyones nga investment deal uban sa ABS-CBN.
Gidalidali pagkanselar ang transaksiyon. Ambot unsay tinuod nga nahitabo: Wa na bang kalahutay ang ABS-CBN sa dakong alkanse, o nakumbinser nga di makasud og laing transaksiyon, maong napugos pag-apil sa kompaniya sa berdugo sa ikaduha nilang pagkapawong. Nga pag-umangkon ra sab sa unang niilog sa ilang sibyaanan 51 ka tuig ang nilabay.
- Latest
