Mga imbestigasyon sa paglubog

Lisod pagbilib sa mga imbestigasyon sa Kongreso. Gawas sa pipila nga nakatsamba. Pagbutyag sa mga anomaliya ug pagkurihir sa kasaypanan. Kasagaran gigamit sa mga senador ug mga kongresista sa pagsakay sa mga kontrobersiya. Ug pagpaukyab. Para sa pamolitika ug personal nga mga interes.

Dunay pipila nga makahatag og katin-awan. Sa tagsa kaayo nga mga higayon nga takos ug ligdong nga mga magbabalaod ang maningog. Pero kasagaran nipasamot sa kalibog. Duna gani mga imbestigasyon nga klarong gitumong sa pagpanlubog. Sama sa pakisusi sa nagkataas nga lista sa pinatyanay sa Negros Oriental.

 * * *

Nahisgutan nang ngan ni kanhi Presidente Rodrigo Duterte. Nga maoy unang timaan nga nasaag na ang pakisusi sa Senado. Sa bangis nga pagpatay ni Gobernador Roel Degamo. Ug laing siyam ka biktima sa masaker sa Pamplona.

Wa katabang pagpanimon sa imbestigasyon. Nga ang tagduma nga si Senador Bato dela Rosa mas naila sa ka-lunod-patay ni Duterte. Kay sa kahinog sa panghunahuna. Nibaha ang mga testimoniya batok sa mga Degamo ug pabor sa mga Teves. Human may saksing nangangkon nga nagpakitabang sa kanhi presidente. Nagpakita hain kapusta ang mga Duterte.

 * * *

Sa pikas nga bahin, nakatsamba ang imbestigasyon sa Senado. Sa pasangil sa coverup sa P6.7 bilyones nga shabu nga nasakmit sa bodega sa Tondo, Manila nga gipanag-iya sa kanhi polis. Nakatunong ang mga senador pagbisto sa pakigkonsabo sa mga polis sa negosyo sa ilegal nga drugas.

Di tungod sa kalantip sa ilang mga pangutana. Kon dili tungod sa kalihay sa mga tubag nga ilang nakuha gikan sa mga opisyal sa kapolisan.

 * * *

Oktubre pa sa niaging tuig nga nasakmit ang dul-an sa libo ka tonelada nga shabu. Sa niaging pito ka buwan, ang opisyal nga imbestigasyon sa Camp Crame wa gyod kaila, ni kasubay, sa mga kauban sa ilegal nga negosyo ni kanhi Police Master Sergeant Rodolfo Mayo Jr.

Ang kataphaw sa tinubagan atubangan sa Senado sa mga operatiba nga nakasikop ni Mayo, apil nang kalit nga pagkalimot sa mga ngan ug mga numero sa telepono, maoy nakapalili sa katawhan sa posibleng hinungdan sa kainutil sa imbestigasyon: Dili ganahan ang mga imbestigador nga mobisto sa ilang kadagkoan. O kaubanan. O sa ilang kaugalingon.