Sekreto ang gasto ug kapuslanan
Ni-resign ang foreign minister sa Papua New Guinea (PNG) nga si Justin Tkatchenko. Human na-eskandalo ang iyang pagtambong sa koronasyon ni King Charles III sa London niadtong Mayo 6. Kay:
• Nasakpan sa mga magbubuhis sa PNG ang dakong gasto sa iyang dakong delegasyon;
• Nalilian sa taga PNG ang pag-usik-usik sa TikTok video nga gi-post sa iyang anak nga si Savannah; ug
• Niulbo ang lapad nga protesta sa ulohang Port Moresby sa pagkondenar sa pagwaldas sa kuwarta sa mga magbubuhis imbes itabang sa katawhan nga apil sa labing kabos sa kalibotan.
* * *
Nitambong sab sa koronasyon si Presidente Ferdinand Marcos Jr. ug ang iyang asawa nga si Liza Araneta Marcos. Pero way protesta nga gilusad. Kay:
• Wa motug-an ang Malacañang pilay gasto ug unsa kadako ang delegasyon sa pagtambong ni Marcos sa koronasyon;
• Way nakatultol sa social media posts sa ayroplanong gisakyanan, hotel nga gipuy-an, ug restaurants ug malls nga giadtoan sa wa pa ug human sa koronasyon; ug
• Way sakop sa mainstream media nagsusi sa aktuwal nga gasto ug kapuslanan sa nagkataas nga listahan sa mga biyahe sa ubang kanasuran.
* * *
Ambot naanad na ba lang ta. Kay 12 na ka biyahe sa presidente sa ubang kanasuran. Pero way nagtagad paghatag og kuwentada: Pila ka milyon ka pesos nga ang gasto; pila ka gatos ang nanguyog; ug unsay ilang mga gasto nga gikuha gikan sa atong buhis.
Gilipat lang ta. Sa gisaad nga binilyon ka dolyar nga balor sa puhonan ug proyekto. Nga utro sang way detalye: Pila nay natuman; ug pilay nalimtan na lang.
* * *
Ambot duna ba say nagtagad sa pagsusi kon ang mga biyahe nilang Marcos ug kaubanan wa ba makalapas sa pagdili sa junkets ubos sa Executive Order No. 77:
Section 19: All forms of travel junkets shall be strictly prohibited. The conduct of strategic planning workshops or team building activities abroad shall not be allowed. The taking of a personal leave immediately before or after the official activity is highly discouraged. If travel circumstances, such as the nature of activity, purpose and itinerary, indicate that the trip is mainly intended for personal purposes, no part thereof shall be considered as official.
- Latest
