Pagbakwi sa kaugalingong bakak
Sa ilang paglusad og digital media literacy campaign batok sa fake news, ang administrasyon ni Presidente Ferdinand Marcos Jr. morang takuri nga nitawag sa kaldero nga itom. Kay duna pa bay molabaw sa kahilas sa pagbatok kunohay sa sayop nga kasayuran nga maoy nakapahimutang nila sa gahom?
Mahimo hinuon nga ulug-ulog ang pahibawo, nga gihimo atubangan sa mga delegado sa United Nations sa New York. Ug mapuno lang sa nagkataas nga listahan sa mga saad nga di matuman. Hangtod nga maka-imbento na sab og bag-ong linya pagpahumot sa ubang kanasuran.
* * *
Pero kon, hinaot pa unta, gikusi sa ilang konsiyensiya ug tinud-on sa Malacañang ang kampanya pagtabang sa katawhan nga mahibawo sa kamatuoran, mangahas mi og sugyot nga unahon pagbakwi ang sayop nga kasayuran nga ilang gipakatap sa niaging kampanya sa eleksiyong presidensiyal sa Mayo 2022:
Nga golden years ang pagduma sa mga Marcos sa Malacañang gikan sa 1965 hangtod nga napalayas sila sa EDSA People Power Revolution sa 1986 (ang tinuod mao nga grabeng kinawatay sa buhis sa katawhan ug pinatyanay sa mga kaatbang sa administrasyon ang nahitabo);
* * *
Nga nilambo pag-ayo ang ekonomiya atol sa diktadura ni Ferdinand Marcos Sr. (ang tinuod mao nga na-bangkarota ang ekonomiya human gipatay si Ninoy Aquino kay wa kabayri ang utang nga imbes itukod og mga proyekto nipaburot sa bolsa sa Marcos cronies);
Nga nilambo ang produksiyon ug naka-export og bugas humay ang Pilipinas pinaagi sa Masagana 99 (ang tinuod mao nga nabangkarota ang mga bangko kay wa kabayad ang mga mag-uuma sa ilang utang kay naalkanse ang ilang mga basakan);
Nga mahimong ?20 na lang ang kilo sa bugas humay ubos sa administrasyon ni Presidente Ferdinand Marcos Jr. (ang tinuod mao nga gikahadlokang krisis sa bugas humay ang mosunod sa krisis sa asukar, asin, sibuyas, ug itlog);
* * *
Nga maapud-apod na sa mga Pilipinhon ang Tallano gold (ang tinuod mao nga si Tiburcio Villamor Marcos Tallano, nga nagpailang hari sa Pilipinas, gipasanginlan og mga krimen apil nang bank fraud); ug
Nga wa makonbikto ang mga Marcos sa bisan unsang kaso (ang tinuod mao nga kadaghan na sila makonbikto sa Korte Suprema ug lower courts sa pagpangawkaw ug kapakyas pagbayad sa buhis).
- Latest
