Umaabot holidays sa mga Marcos
Dunay duha ka umaabot nga holidays nga mahimong makabawi si Presidente Ferdinand Marcos Jr. sa iyang bakikaw nga pagpakahilom niadtong Dominggo, Agosto 21, Ninoy Aquino Day:
• Sa National Heroes Day karong Lunes, Agosto 29, mahimong mas paburuton pang gipasobrahan nang daan nga ihap sa mga medalya ni anhing Ferdinand Marcos Sr. sa ikaduhang gubat sa kalibotan; ug
• Mahimong ipamugos tibuok nasud ang special non-working holiday sa Ilocos Norte karong Septiyembre 11, nga sama sa Aquino Day natunong og Domingo, ug tumanong awhag sa mga loyalista nga tawgon og Ferdinand Edralin Marcos Day.
* * *
Kapin sa tulo ka buwan ang lugway si Marcos Jr., human nakadaog sa eleksiyon sa Mayo, pagplano unsay tukmang postura atol sa nasudnong holiday para sa giisip nga mortal nga kaaway sa iyang amahan. Mahimong dunay giandam nga mensahe kon gituman pa sa presidente ang tradisyon. Pero ang aktuwal nilang gihimo:
• Way tingog bisan ek na lang ang Malacañang;
• Ang troll army nag-piyesta sa pagpakauwaw ni Ninoy Aquino; ug
• Ang trolls sa pipila ka police stations, nga gidudahang nakalimot pag-usab sa ilang accounts, nitawag ni Ninoy nga komunistang terorista.
* * *
Ang presidente dunay mas taas nga lugway pagpili og arang-arang nga postura sa sunod nga nasudnong holiday special non-working holiday sa Pebrero 25, 2023, ang ika-37 nga anibersaryo sa People Power Revolution nga nipalayas sa mga Marcos gikan sa Malacañang.
Mangahas ba siya pagpapas sa holiday? Pahiuyon sa bakak nga biktima ang ilang pamilya sa pagpanggukod sa mga elitista nga wa kadawat nga taga probinsiya sa Ilocos Norte ang nagtungtong sa gahom?
* * *
Maayong unahon ni Marcos Jr. pagtuki unsay himuon sa laing importanteng adlaw sa kasaysayan usa ka buwan na lang gikan karon, ang ika-50 nga sumad sa pagdeklarar sa martial law sa 1972 nga niresulta sa diktadura sa iyang amahan.
Mas maglisod siya pagsagang kay ang Septiyembre 21 gideklarar sa iyang alyadong si kanhi Presidente Rodrigo Duterte nga National Day of Protest pinaagi sa Proclamation 319. Nga ni-detalye nga ang diktadurang Marcos napuno sa “commission of gross human rights violations, arbitrary state interventions, rampant corruption, and disregard of fundamental civil liberties.” Di mabasol ang mga nalipat nga gihulagway ni Duterte ang iyang kaugalingong administrasyon.
- Latest
