Panamilit ni Padre Paking
Gitugon ni Padre Francisco “Paking” Silva ang mga sakop sa iyang pamilya sa di pagsulti ni bisan kinsa sa seryusong sakit nga nakit-an ang mga doktor sa iyang pagsud-gawas sa ospital pila ka buwan ang nilabay. Ang mga suod ni Padre Paking mosulti nimo nga ang bisan unsa niyang tugon tumanon g’yud sa tanang hingtungdan.
Mao nga dihang nakadawat siyag tawag sa telepono human sultihi sa kagrabe na sa iyang sakit, nidiretso si Padre Paking og pangutana, “Nganong nahibawo man ka?” Si Padre Paking ra say nibisto sa iyang sekreto.
* * *
Ang nanawag niya nga usa sa labing suod niyang higala maoy unang nahibawo gawas sa pamilya sa tinuod niyang kahimtang sa panglawas. Labihan nila kasuod nga, bisan gidid-an si Padre Paking pagawas sa pinuy-anan sa Carcar City tungod sa pandemya, niikyas paingon sa Cebu City aron pagtabang pagsulbad sa gisumbong niyang problema.
Wa na siya manawag human nahibawo sa sakit ni Padre Paking. Naglikay siyang makadugang sa kahasol sa pasyente. Iyang nahibaw-an gikan sa ubang mga higala nga gipasaligan silang Padre Paking nga paningkamotan niyang maayo pero andam nang motaliwan.
* * *
Iyang nahibaw-an nga nihangyo si Padre Paking sa mga doktor nga mogawas na sa ospital ug mopauli sa iyang pinuy-anan sa Carcar niadtong Sabado, Disyembre 11. Ug iyang mga suod mosulti nimo nga way makabalibad ni Padre Paking.
Pag-abot sa bay, nabantang sa mga nisugat niya ang labing tam-is niyang pahiyom. Dihang napahimutang na, labihang hinol sa higdaanan nga gikamingawan. Nanugon siya nga di biyaan pero di sab pukawon.
* * *
Namatay si Padre Paking sa iyang pagkatug gahapon sa kadlawon. Gituman ang iyang tugon nga magpa-cremate dayon ug hayaon sa simbahan sa Daughters of Saint Teresa ni Obispo Teofilo Camomot, kansang kawsa sa pagka-santo iyang gilusad.
Hatagan og kahigayonan ang publiko sa pagsud-ong sa iyang urna sa di pa ug human sa misa requiem karong Miyerkules sa buntag. Pero way igong luna ug lugway aron makapanamilit sa linawas ang tanan kansang kinabuhi nahikap ni Padre Paking. Gikan sa iyang pagkanselar sa arancel isip batan-ong kura paruko sa Moalboal hangtod sa iyang hinog nga aktibismo sa labing mahinungdanong mga kawsa hangtod sa kataposan niyang ginhawa.
- Latest
