Alternatibong kamatuoran ni Labella
Kon di hunungon ni Cebu City Mayor Edgar Labella ang iyang paghanig og lahi nga istorya sa kasayuran nga iyang gihatag sa mga Sugbuanon, moabot ang adlaw nga, bisan idiretso niya pagpahibawo ang kamatuoran, wa nay motuo niya.
Ang iyang pagpaburot sa usa lang ka sentence sa report sa Commission on Audit (COA) nga pabor sa iyang administrasyon, sa way paghisgot sa mas daghang findings sa mga anomaliya, mahimong maoy labing grabe. Pero igo lang nisunod sa susamang goryo-goryo sa nangaging mga pahibawo, labi na sa kahimtang sa iyang panglawas.
* * *
Pananglitan, sa iyang Facebook post niadtong Mayo 31 karong tuiga, Lunes, niangkon si Labella nga aron pagpatigbabaw sa transparency iyang gipahibawo nga duna siyay hilanat sa niaging weekend ug nagpa-ospital tungod sa tambag sa mga doktor.
Sa tungatunga na sa post niya gisukip ang findings sa mga doktor nga duna diay siyay pneumonia. Ug bisan makagawas na sa ospital niadtong adlawa sundon ang tambag sa mga doktor nga mopahuway una sa iyang pinuy-anan ug magpapuli og tulo ka adlaw ni Bise Mayor Mike Rama sa pagduma sa Cebu City Hall.
* * *
Gipahibawo sa iyang upisina niadtong Enero 20 karong tuiga nga dunay ear infection si Mayor Labella mao nga nagpa-ospital. Gihimo ang pahibawo lima ka adlaw human nahibaw-i ang sakit sa pagpa-checkup sa mayor sa pribadong ospital niadtong Enero 15.
Niadtong Hunyo 9 karong tuiga, niangkon si Labella nga di lang ear infection ang iyang problema niadtong Enero kon dili hapit gyod siya mamatay tungod sa sepsis. Sukwahi sa pahibawo sa iyang upisina nga sa outpatient department rang iyang checkup, niingon si Labella nga gidali diay siya pagda sa ospital.
* * *
Niadtong Mayo 27, pila ka adlaw sa wa pang pahibawo sa hilanat nga pneumonia diay, niingon si Labella nga ang nidaog sa bidding pagtiwas sa Cebu City Medical Center gipaubos sa post-qualification assessment. Pero pagka Hulyo 2, gipahibawo ni Cebu City Administrator Floro Casas nga, sukwahi sa sulting Labella, gikanselar niyang bidding sa Mayo 4 pa.
Gilingiwan lang sa kasagaran sa mga sakop sa media ang sunudsunod nga sayop nga kasayuran ni Labella. Maong sila say unang na-syut sa buyot sa iyang paglubag sa COA report.
- Latest
