Bakak ang hype pero mas paspas
Human sa kapin sa semana nga pinaabot, bisan tulo ngadto sa lima ka adlaw ra man ang ilang saad, nadawat na ang akong DITO SIMcard. Nga akong na-order online ug pila na ka adlaw nang napahimuslan bisan di compatible ang akong telepono.
Karon makasulti na ko nimo, base sa akong kaugalingon nga kasinatian, nga binuang nang listahan sa compatible devices sa DITO. Magamit ang ilang SIM sa tanang telepono nga LTE o 4G o 5G. Pangilad nang gihimo sa partner stores nga papaliton ka og telepono ug ipakapin ang SIM.
***
Human sa pila ka adlaw nga pagsuway, akong napamatud-an nga tinuod nga mas paspas ang DITO kay sa Globe, Smart, Sky Fiber, ug ubang internet service providers. Pero di sama kapaspas sa ilang gipatuo sa National Telecommunications Commission (NTC) nga 64.4 Mbps ang kinahinayan ug 507.5 Mbps ang kinakusgan.
Kasagaran 20 Mbps ug 18 Mbps ra ang download ug upload speed sa among bay sa bukid sa Casili, Consolacion. Pero igo na nga nakapabarug bisan may kaging usahay sa livestreaming sa akong mga programa sa SibyaTV.
***
Lain nakong nahibaw-an mao nga sukwahi sa pasalig sa DITO di pa kang kahimo og voice calls. Daan na silang niangkon nga wa pa silay interconnection sa Globe ug PLDT, apan nipaibog nga unlimited ang ilang text messages ug HD voice calls tali sa ilang subscribers.
Human sa akong paghangyo sa ubang subscribers sa DITO, may napu nga nipada sa ilang mga numero. Duha ray nitubag sa akong text. Wa kalusot ang akong mga tawag kay “Mobile network not available.”
***
Nakapait sa DITO mao nga dugay kaayong motubag sa mga pangutana sa nakabayad na nilang subscribers. Mas abunda ang bugalbugal sa trolls nga gidudahan nga binayran. Pila ka adlaw na kong nagpaabot, wa pa matubag ang akong email kanus-a ma-activate ang ilang voice calls.
Pero bawi ang tanang kahasol pagkuha sa ilang SIM, salamat sa wa kinahanglana nga paglisudlisod, tungod sa mas paspas nga internet data nga tag-P199 ra. Ambot unsa pay ubang binuang nga mahiagoman. Pero mopasalig nga padayon kong magbantay unsa pay umaabot sa nahibilin sa 30 ka adlaw nga promo period.
- Latest
