Nganong way bilib sa Sinovac
Gisubli pa sa Food and Drug Administration (FDA) sa Pilipinas ang aplikasyon sa Sinovac Biotech nga gipanag-iya sa gobyerno sa China alang sa Emergency Use Authorization (EUA) sa ilang bakuna nga CoronaVac, apan nahibawo na tang daan sa ilang hukom.
Di mangahas ang FDA, kansang kadagkoan wa mabantog sa ilang kaligdong sa pagsukwahi bisan sa labing kuwestiyonable nga mga pangangkon sa Malakanyang mahitungod sa medisina, sa paglawgaw sa way kukauwaw nga pagduso sa pamunoan ni Presidente Rodrigo Duterte di lang sa usa kon dili sa duha ka bakuna sa China.
* * *
Sa wa pang kasugod ang Phase 3 sa clinical trials sa Sinovac sa niaging tuig, niingon nang daan si Presidente Duterte nga mas bilib siya sa katakos sa China paghimo og bakuna batok sa COVID-19 kay sa mga nasud sa kasadpan.
Bisan wa pa mangayo ang Sinovac sa pagtugot sa FDA, nakigsabot na nila ang National Task Force sa COVID-19 nga gipangulohan ni vaccine czar Carlito Galvez sa pagkompra og 25 milyones ka doses sa CoronaVac nga ang pasiuna nga 50 mil ka doses gitakdang moabot na sunod buwan.
* * *
Sukwahi sa pagpabantang sa Pfizer/BioNTech, Moderna ug AstraZeneca sa presyo sa ilang mga bakuna, gitago sa Malakanyang kon tagpila ang CoronaVac. Dihang nabisto nga tag-$5 (P240) rang CoronaVac sa Thailand, nidalidali pagpasalig si Presidential Spokesman Harry Roque nga di molabaw sa P650 ang baligya sa Sinovac.
Nakalimot sila nga gipahibawo sa Department of Health (DOH) atol sa pagtuki sa budget niadtong Nobyembre nga mobayad sila og P3,629.50 sa duha ka doses sa CoronaVac.
* * *
Ang pagpamugos sa Malakanyang sa CoronaVac wa makapapas, hinunoa nakapasamot, sa pagduda sa katawhan sa ka-epektibo ini, nga nabisto nga 50.4% ra sa Brazil, usa sa gipahigayonan sa clinical trials.
Apan ang labing dakong sagpa sa pamunoan mao nga bisan sa agresibo nga pagdupa ni Presidente Duterte sa iyang pinalabi nga bakuna sa China, way mayor ni gobernador sa mga dakbayan ug lalawigan sa Pilipinas nga ganahan sa Sinovac. Ang mga abtik nga nakasud na og kontrata, nga naglakip sa anak sa presidente nga si Davao City Mayor Sara Duterte-Carpio, pulos nipili sa AstraZeneca.
- Latest
