Pagpamugos sa rapid test kits

Nabanhaw ang mga pagduda nga may higanteng raket sa rapid test kits sa Covid-19 dinhi sa ato kay bisan sa pasidaan sa Department of Health (DOH) ug ubang mga eksperto nga di kasaligan padayon gihapong gipamugos sa pipila ka lokal nga mga opisyal ug mga negosyante.

Gituohan nga may dagkong negosyante nga nahinayak sa pagpangompra og daghang rapid test kits gikan sa China sa pagsugod pa lang sa pag-ulbo sa pandemya sayo ning tuiga ug mao karon ang nagpasiugda og mga maniobra aron nga makaginansiya sa dako nilang puhonan.

***

Nabulilyaso ang una nilang maniobra nga ipamugos ang rapid test kits isip panginahanglan sa tanang trabahante sa di pa sila makabalik sa trabaho dihang inanay nga giablihan ang mga kompaniya human sa lockdown sa tibuok Luzon ug dakong bahin sa Kabisay-an ug Mindanao.

Kay bisan sa pagligwat sa tanan nilang koneksiyon, nihukom ang Inter-Agency Task Force (IATF) batok sa Covid-19 nga di obligadong mga trabahante nga mopaubos sa rapid tests ug nipasalig ang DOH nga igo nang pagtuman sa minimum health standards paghimong luwas sa mga trabahoan gikan sa tinakdanay.

***

Nisamot ang ilang kalbaryo dihang nipasidaan ang mga eksperto nga gipangulohan sa Philippine Society of Microbiology and Infectious Diseases (PSMID) nga ang 20 porsiyento rang accuracy rate sa rapid test kits mosangpot og dakong kadaot sa health system ug ekonomiya:

•Ang false positives mohigot sa health workers sa wa kinahanglanang pag-isolate sa mga pasyente ug pag-trace sa close contacts ug maka-inutil sa mga negosyo kay di silang katrabaho; ug

•Ang false negatives modasig sa pagkumpiyansa nga mopasamot sa tinakdanay.

***

Apan gamhanan gyod tingali ang mga negosyante ug ang ilang mga koneksiyon kay, bisan gipasanginlang nakapasamot inay mobadlong sa tinakdanay ang rapid mass testing sa mga dakbayan sa Sugbo, Mandaue ug Lapulapu niadtong Mayo, wa mang kabalibad ang ubang mga politiko ug negosyante sa Sugbo sa ilang gipamugos nga rapid test kits:

•Giawhag na sang mga negosyante sa pag-rapid test sa mamalik nilang mga trabahante; ug

•Mag-rapid mass testing na sab ang Dakbayan sa Sugbo sa kaliboan ka mamaligyaay sa Carbon ug mga molupyo sa mga dapit sa lima ka barangay nga gipaubos sa hard lockdown.