Raket sa rapid test kits
Ambot kang kinsang tumoy sa buhok ang gikuhaan sa lokal nga mga opisyal sa Sugbo sa ilang buotbuot nga kasabotan nga di makabalik sa trabaho ang mga kawani ug di makapangabli sa operasyon ang mga kompaniya kon di ipatuman ang mandatory nga testing ginamit ang rapid test kits matag 14 ka adlaw.
Klarong wa nila konsultaha ang Department of Health (DOH), nga maoy labing suhito sa tukmang mga lagda pagpanalipod sa kahimsog sa mga trabahante, ug ang Inter-Agency Task Force for the Management of Emerging Infectious Diseases (IATF), nga maoy kinatas-ang buhatan nga mohimo og mga lagda sa kampanya batok sa Covid-19.
* * *
Kay ang DOH nipasabot sa lagda sa IATF nga wa kinahanglana nga ang tanang kawani ipaubos sa Covid-19 test di pa pabalikon sa trabaho sa mga dapit nga gipaubos na sa modified enhanced community quarantine (MECQ) ug general community quarantine (GCQ).
Sa tibuok Pilipinas, ang Cebu City ug Mandaue City na lang ang ubos sa ECQ. Ang ubang dakbayan ug kalungsoran sa Sugbo makapangabli na sa kapin sa 90% sa ilang mga kompaniya ug mga industriya ug makapadagan na sa ilang mga sakyanang pamasahero.
* * *
Nagdumili ang DOH pagrekomendar nga gamitan og PCR test kits ug bisan sa rapid test kits ang mga kawani nga wa makaduol sa mga nataptan sa sakit. Gisubli sa DOH nga ang ipaubos sa Covid-19 test mao ra ang mga may mga timaan sa sakit.
Matod sa DOH ang mga way sakit sa niaging 14 ka adlaw makabalik na dayon sa trabaho. Ang mga gidudahan nga nakaduol sa mga nataptan sa Covid-19 mao ray pangayoan og Certificate of Quarantine Completion nga pinirmahan sa health officer sa gipuy-anan nga lungsod o dakbayan.
* * *
Gipahinumdoman sa DOH ang lokal nga mga opisyal nga mamugos sa mga negosyante pagpaubos sa rapid testing sa tanan nilang kawani isip kundisyon sa pagpangabli sa ilang mga kompaniya nga mosukwahi sila sa mga lagda sa IATF.
Hinaot nga mas hawod pa sa IATF si bisan kinsang opisyal nga namugos sa mga mayor ug mga negosyante sa pagpangompra sa rapid test kits. Nga nahibaw-an sa inilang negosyante sa Sugbo nga overpriced kay tag-P160 rang buok gikan sa China.
- Latest
