Bag-ong pamakak sa China
Ang pasiunang pasalig nga nagmalampuson ang agresibong mga lakang sa China sa pagkontrolar sa Wuhan coronavirus tungod sa pagtidlom gidaghanon sa bag-ong mga kaso sa nangaging mga adlaw napapas tungod sa makapakugang nga pagsulbong sa gidaghanon sa mga nangamatay sud sa China sa niaging duha ka adlaw: 97 niadtong Dominggo ug 108 niadtong Lunes.
Sa ato pa, mahimong di paigo ang pagpada sa China og kapin sa 10,000 ka mga doktor ug nurses sa Wuhan ug Hubei, paggasto sa katunga sa $10 bilyones (P510 bilyones) nga gigahin pagsagang sa kagaw ug padayong pagtanggong sa dul-an 100 ka milyon ka molupyo sa mga dakbayan ug lalawigan nga natakdan.
***
Nahaw-ang ang pangangkon sa kalamposan ni China President Xi Jinping dihang nabisto nga ang pagtidlom sa bag-ong mga kaso niadtong weekend tungod diay sa pag-usab sa National Health Commission (NHC) sa China sa definition sa “confirmed case.”
Sukad niadtong Biyernes, gimando sa NHC nga ang mga pasyente nga wa mopakita og timaan sa sakit bisan positibong natakdan sa Wuhan virus di na isipon nga “confirmed case,” sukwahi sa mga lagda sa World Health Organization (WHO). Maong nitidlom dayong gidaghanon sa nangasakit sa Hubei, Heilongjiang, Shanxi, ug Zhejiang.
***
Apan may mga timaan nga wa pa mabadlong ang kagaw:
•Sa 2,300 ka higdaanan sa duha ka tambalanan sa Wuhan nga paspas nga natukod, 320 ray naandam;
•Ang convention center ug mga dormitoryo sa Wuhan nga gipahimutangan sa mga masakiton way mga ali pagpugong sa tinakdanay;
•Dalidaling gitukod ang bag-ong tambalanan sa Shanghai ug gi-rasyonan og pagkaon ang mga molupyo sa Hangzhou aron kahigpitan ang pagpanggawas sa mga pinuy-anan; ug
•Gipahunong ang mga botika sa pipila ka dakbayan pagbaligya og mga tambal sa hilanat ug ubo aron mapugos pagpanggawas ang mga masakiton.
***
Gipanghinaot nga ang delegasyon sa WHO nga tua na sa Beijing makatabang sa pagsusi sa tinuod nga kahimtang sa padayong pagkatap sa kagaw nga nakahulga sa laing 25 ka nasud, apil na sa Pilipinas.
Hinaot nga kapangitaan og panagang sa di pa ang gikabalak-ang pagpanakod sa mga molupyo sa ubang kanasuran nga wa makataak sa Wuhan ug sa bisan asang bahin sa China.
- Latest
