Pagluwas di paghasol
Bisan sa hatag-bawi nga pahibawo sa kapolisan nga di nila pawungon ang signal sa mobile phones apan mahimo ra sang pawungon nga wa nay pasiunang pahibawo kon may matino silang hulga sa seguridad sa bisperas ug sa adlaw sa Piyesta Senyor sa Dakbayan sa Sugbo karong Enero 18 ug 19, kumbinsido ko nga di na mahasol ang atong komunikasyon sunod weekend.
Palihug ayaw ko og tuohi, kay wa koy bisan gamay’ng nahibaw-an sa seguridad, apan kumbinsido kong mahimo na ka nga mag-Facebook Live sa labing unang higayon sukad niadtong 2017.
***
Nganong di man hingpit nga makapasalig ang kapolisan nga di pawungon ang cellsites nga makahatag og signal sa Dakbayan sa Sugbo atol sa Piyesta Senyor? Kay sa natad sa seguridad wa g’yuy makapaneguro, maong kinahanglan nga magbantay sa tanang higayon.
Ulug-ulog ra sa mga polis nang nasuwat sa ibabaw. Ang tinuod mao nga nahinayak nang Police Regional Office sa pagsuwat sa National Telecommunications Commission alang sa signal shutdown. Laksot tan-awon kon mokumpisal ang Cebu City Police Office nga nagpataka ang ilang mga labaw bisan way seryusong hulga sa seguridad.
***
Laing hinungdan nganong hayag nang kahigayonan nga magpabiling buhi ang signal sa mobile phones atol sa Piyesta Senyor mao ang katin-awan sa mga inhinyero sa mga higanteng Globe Telecom ug Smart Communications: Di madali ang pagpawong sa ilang signal maong nagkinahanglan sila og pila ka adlaw nga lugway sa pagpangandam.
Bisan pawungon pang tanang cellsites sa Dakbayan sa Sugbo may signal gihapon. Maong kinahanglan sang pawungon ang cellsites sa kasilinganan labi na sa mas habog nga mga dapit.
***
Way makalalis, bisan ang kaparian, lokal nga mga opisyal ug ubang mga tigpasiugda, sa mga lagda sa seguridad nga ipatuman sa kapolisan. Di sab angay’ng isugal ang seguridad sa mga molupyo ug mamistahay kon may tinuod g’yung hulga.
Apan hinaot nga maamguhan sa kapolisan nga ang naandan na nilang pagpawong sa cellsites sa matag dakong kalihokan di makahimong mas sayon sa ilang trabaho, mas maglisod na hinuon sila sa paglihok. Ug hinaot nga may makahunghong sab sa mga polis nga ang ilang tahas mao ang pagpanalipod, di ang pagpahamtang sa wa kinahanglana nga kahasol, sa katawhan.
- Latest
