Pagpanghawod sa mga banga
Kay nagkapuliki mag panagang sa nagkataas nga listahan sa wa kinahanglanang kahasol sa mga atleta sa 30th Southeast Asian (SEA) Games, ang mga tigpasiugda nidangop sa duha ka laktod nga panagang:
•Una, gipaburot lang sa iresponsableng mga sakop sa media ang pipila ka ngil-ad nga insidente ug gilaktawan ang mas daghang kalamposan sa mga adlaw dayong pormal nga pag-abli sa kalihokan ugma sa gabii; ug
•Ikaduha, di ba mahimo nga sa ngan sa gugma sa nasud palabyon lang una ang mga bulilyaso ug hingpit nga suportahan ang atong mga atleta?
***
Mangahas ko og tubag sa ilang mga panagang:
•Una, igo lang nitaho ang media sa mga reklamo gikan sa lokal ug langyaw’ng mga atleta nga pipila lang sa mas daghang yangungo nga lisod nilang maapil tanan kay mas paspas, mas lapad ang social media sa managlahi nga pinulongan; ug
•Ikaduha, mahimo ba nga sa ngan sa gugma sa nasud atimanon sa mga tigpasiugda ang mga reklamo sa pasiuna pa lang nga mga adlaw aron nga di na mapun-an sa pagsugod na g’yud sa mas daghang mga duwa sunod semana?
***
Nangayo man tuod og pasaylo ang Philippine Southeast Asian Games Organizing Committee (PHISGOC) apan inay angkunon ang hingpit nga responsibilidad nalukop og panulisok:
•Gibasol ang mga nasud nga niusab sa ilang schedule sa pag-abot;
•Gibasol ang mga boluntaryo sa kalangay pagpahibawo sa kaubanang boluntaryo sa mas sayong pag-abot sa mga atleta;
•Gibasol ang mga hotel nga niinsistir sa alas-2 sa hapon nga check in; ug
•Gibasol ang mga senador sa paglaslas sa ilang budget.
***
Angay’ng angkunon na sa PHISGOC ang pait nga kamatuoran nga mahimong umaabot pang mas dagkong bulilyaso tungod sa padayon nilang pagpangita og lusot:
•Di tinuod nga apiki ang panahon sa pagpangandam kay niadto pang 2015 gidawat sa Pilipinas ang tahas human nibalibad ang Brunei;
•Di tinuod nga apiki ang budget kay bisan ang linaslasan nga P17 bilyones mas dako pa bisan ipunon ang tanang gasto sa pagduma sa Pilipinas sa SEA Games sa 1981, 1991, ug 2005; ug
•Inay gamiton ang abundang kasinatian sa nangaging mga pagduma, namugos pagpanghawod ang mga politiko nga way kasinatian pagda bisan liga sa barangay. [email protected]
- Latest
