Pagbanhaw sa dahon sa saging
Mas una ang atong katiguwangan nga nigamit sa dahon sa saging sa pagputos sa mga pagkaon. Mao na ang gihimo nilang Rajah Humabon ug sa ubang Sugbuanon sa pagdunggo nilang Ferdinand Magellan ug kaubanan sa pantalan sa Sugbo 498 ka tuig ang nilabay.
Apan napadaplin na lang sa pagtumaw sa plastik. Nga napamatud-an nga mas sayon, mas barato, mas abunda ug mas lig-on. Nakaplagan sab hinuon nga mas dugay nga madugta, molahutay og gatosan ka tuig. Mao nga gitunglo na karon nga usa sa labing mangtas nga hulga sa kinaiyahan.
* * *
Pagmatuod nga sama sa kalibotan nagtuyok sab ang panahon, ang dahon sa saging mao ang usa sa nalingian nga labing epektibo nga puli sa plastik. Kay dali rang malaya sa init o madugta sa tubig ug busa di makabara sa mga kanal ni makahulga sa mga isda ug ubang kinabuhi sa mga sapa ug dagat.
Tulo ka semana sa di pang Kalag-kalag, mahimong naglingu-lingo ang atong katiguwangan. Gipakaingon sa bag-ong kaliwatan nga mas utokan ug mas kamao kay nila. Apan nipunit ra man diay gihapon pagbalik sa ilang nasugdan.
* * *
Way makalabaw sa dahon sa saging isip putos sa pagkaon: Makadugang sa kahumot labi na sa kan-on; kon matarung paghawob di dali nga magisi bisan unsaon og piko; ug sayon rang hipuson uban sa mga basurang malata human og gamit.
Di hinuon magamit alang sa tubig o sabaw ug ubang basa nga pagkaon, di makaputos sa mas daghan o mas dagko nga mga bawon ug mas dali nga mausik ang pagkaon kon matandogan.
* * *
Sama sa naandan, naapsan ta sa ubang kanasuran sa dugang pagpalambo sa kapuslanan sa dahon sa saging. Sa Peru, duna na silay mga pabrika nga nihimo og tinuod nga mga plato ginamit ang dahon sa saging. Busa mas lapad nang mabaligya, mahimo nang gamiton bisan asa, bisan kanus-a ug sa mas taas nga panahon.
Mawa na hinuon ang kahumot ug ang kalapyo nga makapasamot sa kalami sa pagkaon. Di na sab sama kabarato sa mga kinutlo gikan sa mga nataran. Apan kon mahigugma pagbalik ang katawhan sa dahon sa saging, maibanan nang atong pagka adik sa plastik ug bangis nga pagpanamastamas sa kalikopan.
- Latest
