100% nga ginansiya sa bugas
Dihang nagprotesta ang mga mag-uuma sayo karong tuiga batok sa mga probisyon sa Rice Tarrification bill nga gikabalak-an nga makagusbat sa ilang panginabuhi wa maminaw si Presidente Rodrigo Duterte ug gipirmahan ang balaudnon nga iyang gipasidunggan nga mohimo nang hingpit nga gawasnon sa industriya sa bugas.
Dihang nagprotesta ang mga negosyante karong buwana batok sa mga probisyon sa Security of Tenure bill nga gihulagway nga makapugos nila sa pagpanaktak og mga trabahante kon di man sa hingpit nga pagtak-op sa ilang mga kompaniya ug pagbalhin sa ilang negosyo sa ubang kanasuran gilangay sa presidente ang pagpirma sa balaudnon.
***
Kon duna ka pay nahibilin nga pagduda asa kapusta ning gobyernoha, masulub-on ming mopahibawo nimo nga bisan sa nagbuntaog nang mga ebidensiya nga nakakita og buslot sa balaod ang mga negosyante og bugas humay aron sa pagpaburot sa ilang ginansiya hingpit gihapong gisalikway ni Finance Secretary Sonny Dominguez ang awhag sa pagsubli sa Rice Tarrification Law.
Si Dominguez ang labing sinaligang sakop sa gabinete. Napamatud-an ni dihang gitangtang sa presidente si Agriculture Secretary Manny Piñol human gihulagway ni Dominguez nga pulos hangin. Maong gamay rang kahigayonan nga sukwahion ang labing suod niyang kababata sa Davao.
***
Apan di malalis ang mga ebidensiya nga nahipos sa mga mag-uuma giunsa pagmaniobra ang balaod aron pagpahiyos sa buhis sa mga negosyante ngadto sa gobyerno sa bugas humay nga ilang kinompra sa ubang kanasuran ug pagpahamtang og makalilisang nga ginansiya sa mga konsumidor.
Gilaslasan nila pag-ayo ang presyo sa commercial rice sa pagdunggo sa atong mga pantalan aron ang kinagamyan rang buhis ang ilang mabayran sa Bureau of Customs (BOC). Dayon gipilu-pilo sa makadaghang higayon ang presyo sa bugas humay nga ilang gipabaha sa mga tindahan ug kamerkadohan.
***
Ang BOC shipment entry records nagpakita nga ang presyo pagdunggo sa pantalan (landed cost) sa premium Vietnamese rice (5% broken) tag-P25.33 ra matag kilo samtang ang premium Thai rice (5% broken) tag-P23.06 ra matag kilo.
Apan paggawas na sa mga pantalan, ang premium rice gibaligya sa mga negosyante ngadto sa mga konsumidor sa tag-P50 ngadto sa P60 matag kilo. Sa ato pa, niginansiya sila og P25 hangtod sa P35 matag kilo.
- Latest
