Bag-ong hulga sa lana

Mahimong masumpayan pa sunod semana ang dakong laslas sa presyo nga gipatuman sa mga kompaniya sa lana karong semanaha. May mga nag-una-una na niadtong Domingo ug ganinang kadlawon apan kasagaran sa mga kompaniya sa lana ganina pang alas-6 sa buntag nipatuman sa mosunod nga mga laslas; P0.90 matag litro sa gasolina, P0.80 matag litro sa krudo, ug P0.80 matag litro sa kerosene.

Ang paglaom sa dugang pagbarato sa lana nanukad sa duha ka panghitabo sa unang adlaw sa patigayon karong semanaha: Nisamot pagtibugsok ang presyo sa lana tungod sa paglab-as ni US President Donald Trump sa hulga sa gubat sa patigayon batok sa China; ug ang nag-ung-ong nga mas daghang suplay sa lana gikan sa Estados Unidos.

* * *

Nisulbong ang kabalaka sa pagkahinayon sa gubat sa patigayon tali sa duha ka labing dagkong ekonomiya sa kalibotan tungod sa hulga sa China pagkanselar sa laing hugna sa sabutsabot tali sa ilang mga representante sa Washington karong semana human sa pahibawo ni Trump nga iyang sagpaon og mas dagkong buhis ang mga produkto sa China.

Kon magbugno ang duha ka higante, maduhig ang mas gagmay nga kanasuran. Nga makapahuyang sa kalibotanong ekonomiya. Nga mosangpot sa, nakatag-an ka, pagtidlom sa demanda ug dugang paghagsa sa presyo sa lana.

* * *

Makapahibung ang kalit nga pagpangisog ni Trump human nipadayag og katagbaw sa gilugwayan nga sabutsabot sa patigayon tali sa duha ka nasud sa niaging mga semana.

Sa makausa pa, napamatud-an ni Trump nga ang iyang mga mensahe sa Twitter labihan kamahinungdanon nga mahimo silang makapatay-og sa kalibotan. Ang labing uwahing tweet ni Trump nakapahagsa di lang sa presyo sa lana kon dili sa financial markets sa nagkalainlaing kanasuran.

* * *

May nakit-an hinuon ni kanhi senador Serge Osmeña nga maayong kahigayonan alang sa Pilipinas kon mahinayon ang trade war sa China ug Estados Unidos:

• Molambo ang patigayon tali sa China ug Pilipinas kay mahimo tang usa sa alternatibo nga tinubdan ug merkado sa mga produkto sa China aron makalikay sa buhis sa Estados Unidos; ug

• Mahimo sab tang alternatibo nga tinubdan ug merkado sa mga produkto sa Estados Unidos aron paglikay sa buhis sa China.