Ang PLLO ug DESLA

Inay ang bugtong Sugbuanong sakop sa gabinete nga si Secretary Adelino Sitoy, tagduma sa Presidential Legislative Liaison Office (PLLO), si Atty. Ryan Alvin Acosta, Deputy Executive Secretary for Legal Affairs (DESLA), ang makapasabot sa mga magbabalaod sa sunudsunod nga pag-veto ni Presidente Rodrigo Duterte sa ilang mga balaudnon.

Niinsistir si Sitoy nga wa magmika ang PLLO isip taytayan sa Malakanyang ug Kongreso sa pagpanday og mga balaudnon. Iyang giila ang DESLA nga maoy nagsubli sa mga balaudnon dayong adto sa presidente.

* * *

Gisubay ni Sitoy ang trabaho sa PLLO:

Pagpahibawo sa Malakanyang sa mga balaudnon nga gituki sa Kongreso;

Pagdapit sa mga sakop sa gabinete nga kinahanglang moatubang sa House of Representatives ug Senado nga nagtuki og mga balaudnon; ug

Paghusay kon magkasungi ang baruganan sa mga sakop sa gabinete ug mga magbabalaod.

* * *

Gitataw ni Sitoy atol sa Arangkada sa DYAB Abante Pa, Bisaya! nga di mahimo sa PLLO ang mosunod:

Pagpangutana ni Presidente Duterte unsay iyang tan-aw sa mga balaudnon sa House ug Senado kay di silang kapaabot nga makahigayon pang presidente sa pagbasa; ug

Di silang kaapil, di ganing kalili, sa pagsubli sa DESLA sa mga balaudnon nga nagpaabot na lang sa pirma sa presidente.

* * *

Gawas pa, nipasabot si Sitoy nga kon moabot na sa DESLA, ang balaudnon di na mahimong ibalik sa Kongreso. Bisan unsay sangpotanan sa pagsubli sa DESLA, ang sunod nga tugpahan sa balaudnon mao nang buhatan sa presidente. Ang sunod nga mahitabo mao nang pagpirma o pag-veto sa balaudnon.

Parang Sitoy siya ray nakit-an nga labing sayon nga tulisukunon.