Mirisi ang tihik nga mga ospital
Wa kapugong sa ilang kaugalingon, namikat ang nahimangod nga nurses ngadto sa mga tagduma sa pribado nga mga tambalanan nga nitiyabaw na karon sa kanihit sa nurses nga moatiman sa ilang mga pasyente. Matod sa nurses ang kahakog sa mga tag-iya sa mga tambalanan ang labing dakong hinungdan sa kanihit.
Tungod sa malampusong pagbabag sa Philippine Hospital Association (PHA) sa balaudnon sa Kongreso nga mopausbaw unta sa minimum nga suholan sa nurses niadtong 2016, gipili sa nurses ang call centers ug ubang kahigayonan sa trabaho nga nihatag nila og mas makiangayong suholan.
* * *
Gawas nga namalibad na sa mga pasyente di tungod sa kakuwang sa kuwarta ug higdaanan kon dili tungod sa kanihit sa nurses, ang mga tagduma sa mga tambalanan nidangop pa g’yud og laing di makiangayon nga lakang:
Gipatas-an nila ang duty sa nurses gikan sa walo ngadto sa 12 ka oras matag adlaw nga mao ra gihapon ang suholan, ang pipila gani wa magtagad paghatag og overtime pay. Nipasamot ni sa diskontento sa nurses nga wa katabang sa kawsa sa mga tambalanan pagsulbad gilayon sa krisis sa kanihit.
* * *
Kanhi clinical instructor nitug-an nako nga ni-undang siya pagtudlo sa College of Nursing tungod sa kagamay sa suholan. Katunga sa iyang mga tinun-an tua na magtrabaho sa call centers kay nadani sa mas dakong suholan nga kapin sa P20,000 matag buwan.
Mga 15% sa iyang mga gradwado nakatrabaho na sab sa ubang kanasuran. Siya mismo nilikay sa mga tambalanan tungod sa kabug-at sa mga gimbuhaton kay tulo ra ka staff nurses ang gidestino sa ward nga may 60 ka pasyente.
* * *
Naigo sab sa kanihit sa nurses ang ambulance service sa Cebu City Hall. Matod ni City Disaster Risk Reduction and Management Officer Nagiel Bañacia ang ilang nurses igo lang nga makakuha og kasinatian dayong larga sa gawas sa nasud.
Nanghinaot si Bañacia nga kon matukod nang Department of Disaster Resilience, makakuha nang local government units og nurses ug ubang kawani nga dunay regular plantilla positions, nga makadawat na og suholan nga mas dako kay sa P600 ang adlaw nga ilang gidawat karon ug sa dugay na nilang gipangandoy nga security of tenure.
- Latest
