Pait nga pinaskohan
Ang wa paabotang kandidato pagka kongresista sa ika-unom nga distrito sa Sugbo, si Atty. Baldomero Estenzo, nakugang sa sumbong sa usa ka opisyal sa barangay sa Mandaue City nga iyang nahinabi human nakasumiter sa iyang certificate of candidacy. Gisaaran sila og building sa ilang kongresista. Apan may gamay silang problema: Way luna ang barangay nga katukoran sa building.
Maong nakahukom si Estenzo nga di mosunod sa pagpatuyang og saad. Determinado siyang maminaw una unsay labing mahinungdanon ug dinalian nga mga panginahanglan sa mga molupyo nga iyang maatiman kon makalingkod sa Kongreso.
* * *
Wa mag-inusara ang opisyal sa barangay nga nikumpisal ni Estenzo. Daghan uyamot nga lokal nga mga opisyal nga nakugang na lang sa mga proyekto nga gipatuman sa ilang mga barangay, lungsod, dakbayan ug lalawigan.
Samtang nakapasalamat nga wa sila makalimti sa binahinay sa pundo, nahasol ug nahinugon pag-ayo nga ang mga proyekto di maoy labi nilang gikinahanglan. May mga proyekto gani nga di gyod nila kapuslan. Nahibung na lang nganong nagbuut-buot ang labawng mga opisyal sa pagpatuman sa proyekto sa way pagkonsulta nila ug, labaw na gyod, sa mga molupyo.
* * *
Di pa gyod na mao. Duna pa gyoy mga proyekto nga di ikapatuman. Kay ang implementing agencies, sama sa Department of Public Works and Highways (DPWH), Department of Education (DepEd) ug Department of Health (DOH), way kasayuran ug way katakos sa pagpatuman sa mga proyekto.
May kadalanan nga way gahin pagpamalit sa maagian nga pribadong mga luna, may mga eskuylahan ug health centers nga way katukoran, kon duna man, ang mga luna nahulga sa baha ug dahili sa yuta.
* * *
Gitumbok ni Senador Panfilo Lacson ang taho sa Commission on Audit (COA) nga P583 bilyones nga balor sa mga proyekto ang nausik sa 2017 tungod sa way kapuslanang mga proyekto. Kasagaran nila nasuspenso, o nahunong, o na-kaso tungod sa mga anomaliya, o nakaplagan nga wa diay kinahanglana, o napamatud-an nga ang gitahasan nga mga buhatan way kahimanan o way igong panahon sa pagpatuman.
Kapait sa atong pinaskohan gikan sa Malakanyang ug sa Kongreso: Nalangay nang nasudnong budget sa 2019, nagtinulisokay pa gyod ang mga kongresista, senador ug gabinete kinsay nakasipong sa labing dakong gahin.
- Latest
