Kanus-a moulbo ang gubat patani?
Dihang nilampos si kanhi Presidente Gloria Macapagal Arroyo pagkudeta ni kanhi House Speaker Pantaleon Alvarez, nitumaw ang mga pangagpas nga di siya magpabilin nga ika-upat lang sa lumbay sa labing gamhanang mga opisyal sa nasud. Nakasuway na sa pagka numero uno, mosugot ba lang nga malansang sa numero 4?
Mahimo hinuon nga nitabang lang si Arroyo ni Davao City Mayor Sara Duterte Carpio pagpalagpot ni Alvarez ug mopahuway na sa politika human sa iyang termino. Apan pasiunang mga lakang ni Arroyo sa House of Representatives nagpakita nga di pa siya andam nga magpadaplin.
***
Usa sa mga timaan nga nag-aliwaros pa ang politikanhong mga ambisyon ni Arroyo mao ang iyang pagpamugos sa pagpasar sa kausaban sa 1987 Constitution. Hilom niyang gipayuhot ang iyang kaugalingong bersiyon pila lang ka adlaw human nipasalig nga di niya dasonan ang binuang nga pasidaan ni Alvarez nga mag-constituent assembly ang House bisan di moapil ang Senado.
Ang nahitabo mao nga samtang kutob ra sa sulti si Alvarez, gibuhat g’yung Arroyo. Mas una pa ganing napasar ang iyang bersiyon sa batakang balaod kay sa mas mahinungdanon unta nga nasudnong budget.
***
Labing uwahing timaan sa pagpakita sa kampo ni Arroyo sa ilang braso bisan batok sa mga sinaligan ni Presidente Duterte mao ang ilang pag-asal ni Budget Secretary Benjamin Diokno ug pagsaway ni Cabinet Secretary Karlo Nograles sa kontrobersiya sa pork barrel sa 2019 budget.
Niawhag nang mga kongresista ni Presidente Duterte sa pagtangtang ni Diokno. Bisan wa pa motingog ang presidente, giduphan sa Malakanyang si Diokno ug gidid-an na pagtambong sa sunod nga hugna sa imbestigasyon sa House.
***
Laing bantayanan mao ang gihulagway nga proxy war nilang Presidente Duterte ug Speaker Arroyo sa piniliay sa pagka gobernador sa Bohol karong Mayo: Si kanhi Cabinet Secretary Jun Evasco ang kandidato sa presidente; samtang si Kongresista Arthur Yap ang kandidato ni Arroyo.
Motinuod ba g’yud og pangampanya ug hatag sa tanang suporta ang presidente ug si Arroyo alang sa nagkabangga nilang mga alyado? May sukaranan ba ang pangagpas nga inihap na lang ang mga adlaw sa hingpit nang pag-ulbo sa gubat tali sa duha ka kampo nga maglambigit na g’yud sa mga prinsipal?
- Latest
