Ban sa balikas ug insulto

Kapugngan ba sa ordinansa sa Dakbayan sa Baguio ang pagpamalikas ni Presidente Rodrigo Duterte sa sunod niyang duaw ug diskurso? May mangahas ba nga lokal nga mga opisyal sa Baguio sa pagpasidaan sa presidente sa di paglapas sa bag-o nilang lagda?

Gipirmahan ni Baguio City Mayor Mauricio Domogan duha ka buwan nang nilabay ang Anti-Profanity Ordinance nga gipasar sa city council nga nagdili sa pagpamalikas sa mga dapit nga may mga bata, labi na sa mga eskuylahan. Apan mapugos ba ang presidente sa pagtuman ini?

* * *

Ang ordinansa nga gisugyot ni Konsehal Lilia Farinas nagdili sa mosunod:

• Pagpamalikas ug pagpanginsulto, direkta man o gipasumbingay lang, batok ni bisan kinsa; ug

• Paggamit og bastos nga mga pung sa pagpadayag sa kasuko, kakugang, kahimangod, ug naghingapin nga mga pagbati.

Nipasabot si Farinas nga ang pagpamalikas kasarangan nang himuon bisan asa, nga bisan ang mga bata nagtuo na nga ang pagpamalikas mao nay naandan sa katilingban, sa way pagtugkad sa ngil-ad nga mga sangpotanan. Matod niya gikinahanglan ang ordinansa aron pagpanalipod ug pagpalambo sa kaligdong ug pagtahud sa kabataan.

* * *

Si bisan kinsang abogado mosulti nimo nga kublan si Presidente Duterte sa bisan unsang kaso. Di siya makiha sa bisan unsang kalapasan sa balaod. Labi nang di siya mapahamtangan sa mga silot nga gitakda sa yano nga ordinansa sa usa sa labing tumoy nga dakbayan sa nasud.

Wa kabadlong sa mga balikas ug insulto ni Presidente Duterte ang mga sibyaanan sa radyo ug telebisyon ug mga pamantalaan. Maong naglanug-lanog hapit matag adlaw ang bastos niyang mga pung ngadto sa tanang suok sa nasud ug mga dunggan sa labing linghod nga mga bata.

* * *

Bugtong makadut sa presidente mao ang impeachment complaint nga mapasaka lang kausa sa usa ka tuig. Nga tungod sa makabungog niya nga mayoriya sa House of Representatives ug sa Senado segurong mabalibag ra dayon sa basurahan.

Maibanan ba o hingpit na g’yung malikayan ang pagpamalikas ug pagpanginsulto ni Presidente Duterte sa iya unyang pakigpung sa sunod nga gradwasyon sa Philippine Military Academy sa Baguio City sa Marso sa sunod tuig? O mameligro silang Domogan, Farinas, ug kaubanan nga kapasanginlang mga durugista tungod sa pagpangahas pagbadlong niya?