Panamastamas sa kinaiyahan
Sa iyang paghatag sa Cebu Provincial Environment and Natural Resources Office (PENRO) og 20 ka adlaw sa pagsubli sa tanang pagpangubkob sa bas ug graba sa nagkalainlaing bahin sa lalawigan, hinaot nga wa lang mag-apura si Gobernador Junjun Davide tungod sa tiyabaw sa mga negosyante sa daotang epekto sa paghunong sa quarry operations sa ilang mga proyekto.
Hinaot nga hatagan niya og mas dako nga pagtagad ang kaluwas sa mga molupyo duol sa mga dapit nga iyang gitugotan nga kuhaan og bas ug graba alang sa mga kontstruksiyon sa patag.
***
Hinaot sab nga human sa iyang pakigtagbo sa quarry operators sa Sugbo, si Jason Lozano, ang tagduma sa PENRO, makahigayon sab sa pakigsulti sa mga molupyo nga nabalaka sa pinatuyangan nga pagkubkob sa bas ug graba sa ilang palibot.
Mas makatabang sa tanang hingtungdan kon maminaw g’yud si Lozano sa mga reklamo ug mogahin og panahon sa pagsuhid sa mga hulagway ug ubang mga dokumento sa lapad nga kadaot ug di modiretso lang og dupa sa quarry operators nga naglakip sa suod nga mga alyado sa politika sa kadagkoan sa Kapitolyo.
***
Mas taas hinuon ang panahon nga gitakda ni Davide kay sa 15 ka adlaw nga ban sa quarry operations nga gipahamtang ni Kalihim Roy Cimatu sa Department of Environment and Natural Resources sa tibuok Central Visayas ug ubang rehiyon.
Hinaot nga makit-an sa mubo nga panahon ang makalilisang nga hulga sa kinaiyahan nga namugna tungod sa pagpangiyugpos sa hingtungdan nga mga buhatan sa gobyerno sa taas na uyamot nga panahon.
***
Di makiangayon ug nangalisbo gani nga way kaikog ang awhag sa mga negosyante sa Sugbo ug ubang bahin sa nasud nga libkason sa labing daling panahon ang ban sa quarry operations kay mahimong malangay ang ilang mga proyekto ug moburot ang ilang gasto.
Atubangan sa pagbangotan sa mga nangamatay pagdahili sa yuta sa Sindulan, Tinaan, Naga City sa habagatang Sugbo ug sa Ucab, Itogon sa Benguet, di makatawhanon ang pagpalabi sa mga negosyante sa ilang kabalaka nga mosaka ang presyo sa semento ug ubang construction materials tungod sa nauwahi na nga lakang sa gobyerno pagsusi sa ilang way pupanagana nga pangabuso.
- Latest
