Nakalingkawas ni Ompong
Nakaikyas ang Sugbo ug Kabisay-an sa labing bangis nga epekto sa bagyong Ompong. Labihan ra natong layoa gikan sa iyang giagian sa amihanang tumoy sa Luzon nga wa ta maabot sa kusog niyang uwan nga may gilapdon nga 900 ka kilometro.
Labing grabe natong nabatyagan ang Habagat nga mas nikusog tungod sa iyang presensiya ug nihuros hangtod sa 60 ka kilometro matag takna. Mao ni sukaranan sa pasidaan sa Philippine Atmospheric, Geophysical and Astronomical Services Administration (PAGASA) sa mas dagkong bawod ug sa paggaid sa Philippine Coast Guard sa tanang barko gikan ug padung sa Sugbo ug ubang bahin sa Kabisay-an.
* * *
Giila na sa Joint Typhoon Warning Center (JTWC) sa Estados Unidos si Ompong nga super typhoon. Apan alang sa PAGASA kusog lang siya nga bagyo kay wa kaabot ang hangin og 220 ka kilometro matag takna.
Matod sa JTWC ang labing kusog nga hangin ni Ompong niabot og 278 ka kilometro matag takna samtang ang PAGASA nakasukod lang og 205 ka kilometro matag takna. Ang PAGASA nagsukod sa hangin matag 10 ka gutlo samtang ang JTWC nagsukod matag gutlo.
* * *
Maayo na lang nga wa matinuod ang gikabalak-an sa lokal nga mga opisyal sa Sugbo ug Kabisay-an nga pagkaguba sa kabalayan, pagkatumba sa kakahoyan ug pagkaangol ug pagkakalas og kinabuhi tungod sa lapad nga pagbaha ug pagdahili sa yuta.
Ang labing dakong kadaot nga atong nahiagoman mao ang pagkatanggong sa kaliboan ka pasahero ug tinonelada nga mga kargamento, labi na ang mga pagkaon, sa mga pantalan tungod sa wa pagbiyahe sa mga barko.
* * *
Nipakita nang adlaw sa Sugbo ug Kabisay-an gahapon, mas sayo og usa ka adlaw kay sa pangagpas sa PAGASA. Pat-ak-pat-ak na lang ang uwan apan padayon ang mas hinay nga huros sa Habagat sa tibuok adlaw.
Gipaabot nga mas maayo nang kahimtang sa panahon sa Sugbo ug Kabisay-an karong adlawa tungod sa gitakda nga paggawas na ni Ompong sa Philippine Area of Responsibility paingon sa Hainan ug ubang bahin sa mainland sa China. Apan gikabalak-an nga lapad ang kadaot nga namugna sa iyang pagkusu-kuso sa Cagayan, Abra, Apayao, Kalinga, Ilocos, Isabela, Batanes, ug kasilinganan nga mga lalawigan.
- Latest
