Pagpanalipod sa BRT
Nakakuha ko og kopya sa Binisaya nga suwat ni Engr. Pedro Adonis Compendio, usa sa labing bantogang civil engineers di lang sa Sugbo kon dili sa tibuok nasud (kinsa niangkon nga nagpadaplin na lang aron paghatag og higayon sa mga batan-on), nga nag-awhag ni Presidente Rodrigo paghinayon pagpatuman sa Bus Rapid Transit (BRT) sa Dakbayan sa Sugbo.
Si Compendio nga sama ni Duterte natawo sab sa Leyte nahibawo sa iyang gipanulti. Nakatampo siya sa pagpabarug sa higanteng mga istruktura sa Sugbo, apil nang Marcelo Fernan Bridge nga nakahatag niya og kalibotanong mga pasidungog. Gidapit ni Compendio ang presidente pagsusi sa tulo ka aspeto sa kontrobersiya.
* * *
Una, ang proseso sa pag-aprobar sa BRT:
• Ang mga eksperto sa Dakbayan sa Sugbo mao’y niandam sa gikinahanglang mga dokumento;
• Gisumiter ang mga dokumento, gisubli ug giaprobahan sa DOTC (karon DOTr), dayon sa NEDA ug sa NEDA ICC;
• Ang mga eksperto sa World Bank ug French Development Agency nisubli sa aplikasyon sa funding sa BRT; ug
• Unom ka tuig human aprobahi sa DOTC ang BRT niadtong 2008, napirmahan ang loan agreement sa pagpatuman na sa proyekto niadtong 2014.
* * *
Ikaduha, giawhag ni Compendio si Presidente Duterte sa pagtandi sa agi (track record) sa mga protagonista sa kontrobersiya:
• Ang mga tigpasiugda sa BRT nga gipangulohan ni Cebu City Mayor Tommy Osmeña may lapad nang kasinatian ug nakapatuman na og daghang proyekto nga susama kadako sa BRT; samtang
• Ang mga nisupak nga gipangulohan ni Presidential Assistant Mike Dino wa pay mapakita nga bisan unsang proyekto.
* * *
Ug ikatulo, ang mga nagsugyot sa BRT pinili ug busa kapaninglan sa katawhan, samtang ang mga nisupak sa proyekto tinudlo lang sa ilang katungdanan, nga sama sa ubang mga tinudlo sa presidente dali ra kaayong gitangtang, wa makiha ug wa makapanubag sa mga pasangil sa kahiwian batok nila.
Matod ni Compendio di makiangayon alang sa mga Sugbuanon nga isalikway ang BRT aron pulihan sa LRT nga wa pay pagtuon unsay tukma nga porma, pilay gasto, unsaon sa pagpatuman ug kanus-a masugdan ug mahuman. Nisugyot siya nga mahimong sumpayon ang duha ka proyekto: BRT alang sa Cebu City ug LRT alang sa Metro Cebu.
- Latest
