Evasco lupig ni Go
Dihang gisugo ni Presidential Aide Bong Go silang PNP Director General Bato dela Rosa ug PRO-7 Chief Noli Taliño sa paghikay sa malinawon nga pagsurender ni David Lim Jr. sa Dakbayan sa Sugbo, human sa duha ka adlaw nga pagtago sa suspitsado sa pagpamusil sa nurse nga iyang gikalalis sa trapiko sa niaging buwan, way bisan usa nga nikuwestiyon sa gahom ni Go.
Kay si Go ang giisip nga usa sa labing suod ug sinaligan ni Presidente Rodrigo Duterte. Hapit tanang komunikasyon gikan ug alang sa presidente moagi ni Go.
* * *
Mao nga bisan gipasidan-an ni Duterte ang iyang mga suod dinhi sa Sugbo sa pagpalayo sa uyoan ni Lim Jr., ang gipasanginlan niyang drug lord nga si Peter Lim, bisan ang mga nasuhito nagtuo nga nipatigbabaw gihapon ang talagsaong kasuod nilang Go ug Peter Lim.
Bisan sa katin-awan ni Go nga di si Peter Lim ang nagpatabang niya, kay ang mga ginikanan ni Lim Jr. didto nidangop ni Peter Go, negosyante sa Davao nga suod ni Duterte, way nibaraw sa iyang pagpanginlabot sa kaso tungod sa panaganang may bendisyon siya sa presidente.
* * *
Karon nitumaw nga may sukaranan diay silang dela Rosa ug Taliño sa pagyangu-yango ni Go. Napamatud-an sa labing uwahing lahugay sa gabinete unsa kadako sa gahom ni Go isip labing sikit ni Duterte.
Napahinumdoman sa talagsaong gahom ni Go ang laing sinaligan ni Duterte, kansang tabang pagpadaog niya di malalis kay siya man ang nasudnong campaign manager sa niaging piniliay, ang Bol-anong Cabinet Secretary nga si Jun Evasco.
* * *
Nisuway si Evasco pagsumbong ni Duterte sa giingong abuso ni Administrador Jason Leandro Aquino sa National Food Authority (NFA) nga nilaktaw sa gipangulohan ni Evasco nga NFA Council. Nga maoy may gahom pag-umol og mga lagda. Si Aquino igo lang mopatuman sa mga mahukman sa NFAC.
Si Evasco nisugat sa pagtugpa ni Duterte sa NAIA gikan sa Thailand niadtong Marso 23 (dala) ang ubang mga dokumento batok ni Aquino. Apan si Aquino suod nilang Go ug Davao City Vice Mayor Paolo Duterte. Wa moabot ni Duterte ang mga dokumento. Ug ang sinaligan hinuong Evasco sa NFAC nga si Undersecretary Halmen Valdez maoy nataktak.
- Latest
