Subornohan unta si Tommy

Gibutyag ni Cebu City Mayor Tomas Osmeña nga may tawo nga mitawag sa iyang cellphone nga nagpahibawo nga andam kining mohatag og dakong kantidad nga salapi bugti sa paghunong na paghimo'g kampanya batok sa mga tax evaders.

Wala magpaila ang tawo nga nanawag sa mayor ug wala usab ibutyag ni Osmeña kun posible ba kini nga sinugo kadto sa tagdumala sa SM Prime Holdings Corporation o kaha sa Banco de Oro nga iya karong gigukod pag-ayo.

Gidaygan ni Osmeña ang nanawag kaniya nga dili siya mapalit, ingon man dili siya mahulga, ug mopadayon gyud siya paggukod sa mga magpapatigayon nga manikas aron dili makabayad og dakong buhis ngadto sa dakbayan.

Husto ang gihimo ni Osmeña nga gibalibaran dayon ang tawo nga gustong mosuborno kaniya. Kinahanglan gyud nga pabayron sa tukmang buhis ang mga magpapatigayon.

Apan ang nindot unta niadto nga gipa-entrap sa mayor kadtong misuway'g panuborno kaniya aron motagam. Sa ingon nga paagi, mahibaw-an pa unta kon kinsa ang nagsugo sa maong tawo nga pasubornohan ang mayor.

Ang tinuod, gamay gyud kaayo ang business tax nga gibayran sa BDO ngadto sa City Hall. Tiaw mo, sa usa nila ka branch diha sa Magallanes mibayad ra sila og subra sa P2,000 nga business tax sa usa ka tuig nila nga operation.

Mas dako pa gud og gibayran nga buhis ang tag-iya og gamay kaayong tindahan diha sa Colon Street nga namaligya lang og casing sa cellphones. Apan tan-aw nako niini, duna sa'y palpak ang mga kawani sa Cebu City Treasurer's Office.

Siyaro, wala gyud kamo makabantay nga gamay kaayo ang gideklarar nga kinitaan sa maong bangko? Ang nakadaot gud ninyo kay kaniadto modawat ra man mo kon pila ang buhis nga ibayad. Pagkatoytoy!

Ang maayong buhaton sa kadagkoan sa BDO nga idiga na lang gyud ang ilang tinuod nga kita ug bayran ang tukma nga kantidad sa ilang obligasyon. Mas nindot kon hatagan na lang og higayon ang BDO nga magbag-o, pero pamultahon.

* * *

Kay mayoriya na man ang Bando Osmeña Pundok Kauswagan (BOPK) diha sa Cebu City Council, angay nga ibalik na gyud ang towing operation sa mga sakyanan nga ipataka lang pag-parking daplin sa karsada ug aseras.

Kaniadto, mura'g mag-ukon-ukon pa si Mayor Osmeña kay dili pa man sila ang mayoriya, apan tungod sa pagbali ni Konsehal Jerry Guardo sa BOPK, mas daghan na ang konsehal nga alyado sa BOPK.

Kining mga tag-iya'g sakyanan nga magpataka lang pagparking diha sa daplin sa karsada, nakapasamot sa problema sa trapiko.

Angay'ng tudloan og leksyon kining maong mga tawo. Dili ikalimod nga misamot ang problema sa trapiko dinhi sa dakbayan tungod kay daghan sa mga tag-iya'g sakyanan gihimong parking area ang karsada.

Pinaagi sa pagbalik sa towing operation, mahapsay pa ang atong karsada kay mahadlok na man ang mga tag-iya'g sakyanan nga magpataka'g parking, ingon man mokita pa ang dakbayan gikan sa multa ug towing fee sa mga tag-iya sa sakyanan nga maguroy.

Kinahanglang tudloan gyud ang mga tag-iya'g sakyanan nga mahimo sila nga responsible, ug dili kay magpasuwabi ang ilang pagka abusado.