Tulo ka sunog misugat sa 2017

CEBU, Philippines - Dul-an sa P5 Milyones ang danyos sa sunog nga niigo sa tulo ka lugar sa Dakbayan sa Mandaue atol sa pagsugat sa Bag-ong Tuig nga gilangkoban sa usa ka bodega ug 210 ka panimalay ang naugdaw.

Kini ang gitug-an ni Senior Supt. Samuel Tadeo, ang Regional Director sa BFP 7 nga nahinabi sa Banat News.

Si Tadeo kinsa nangunay  sa pag-monitor sa fire scene atol sa pag-ulbo sa sunog miingon nga alas 12:20 sa kadlawon nadawat nila ang unang alarma sa usa ka bodega diha sa  New Derke sa may Ouano Street sa Brgy.  Looc nga gipanag-iya sa magtiayong Shinley Lee.

Sumala pa ni Tadeo, base sa initial nga imbestigasyon nga ilang gipahigayon sa mga security guards sa warehouse, ang gidili nga sky lanterns ang nitugpa sa atop sa bodega.

Ang mga assorted plastic wares sa sulod sa maong bodega daling nalanay ug nidako hangtud nga nasunog gyud ang bodega ug nagbilin kini og dili mominos sa usa ka milyon ka pesos.

Pagka ala-1:01 sa kaadlawon laing sunog ang niigo sa may Sitio Sto. Niño sa Brgy. Guizo, diin 90 ka panimalay ang naugdaw nga nagsugod sa panimalay ni Paulinian Ompong. Matud pa sa altar niini sa ikaduhang andana nagsugod ang sunog.

Gitug-an ni Tadeo, posibleng overloaded nga linya sa kuryente maoy hinungdan sa pag-spark sa altar nga karon nagbilin og P2 Milyones nga danyos.

Ang ikatulong sunog nahitabo ala-1:05 sa kaadlawon nga nagsugod sa panimalay sa usa ka Bebot Cayoca nga mitakod sa 120 ka panimalay ug nagbilin usab og dili mominos sa P2 Milyones nga danyos.

Gibutyag ni Tadeo, ang sunog sa Looc giisa nila ngadto sa Task Force Alpha, Task Force Bravo sa Guizo ug 3rd Alarm sa Brgy. Maguikay.

Ang BFP sa dakbayan gikatakdang moimbitar sa mga tawo nga posibleng makahatag og dugang impormasyon bahin sa nahitabo nga sunog.

Si Tadeo, nipadayag nga naglisod gayud sila sa Guizo ug Maguikay tungod sa kahagip-ot sa lugar ug kakusog usab sa hangin.

Mga silingan nga dakbayan ug kalungsoran apil sa nitubag sa sunog sa Mandaue. Mao kini ang labing unang   insidente sa sunog nga natala sa BFP 7 atol sa pagsugat sa bag-ong tuig.

Kadaghanan sa mga nasunogan, ang walay nabitbit tungod sa kakalit sa sunog. Ang mga nasunogan kasamtangan nga gipahimutang sa basketball court ug gymnasium sa maong mga barangay.

Si Mayor Luigi Quisumbing, maoy nangulo sa Mandaue City Government nga nibisita sa lugar ug nangapod-apod og pagkaon ug nimando sa City Social Welfare Services nga mopahimutang og mga tents para sa mga nasunugan.

Si Felix Suico nga maoy pangulo sa, Mandaue City’s Local Disaster Risk Reduction and Management Office miingon wala gayod sila magdahom nga sunog ang mosugat sa 2017 sa siyudad apan maayo gihapon kay dali silang nakaresponde ug napawong kini. -/EIM (BANAT NEWS)