5 ginto nilunod ng Baguio City tankers

Lin, Tao umagaw din ng eksena, tig-4 ginto ang nilangoy

TAGUM, DAVAO Del NORTE, Philippines –Tatlong taon na ang nakararaan nang pumasok si Maenard Batnag sa mundo ng taekwondo at soccer bago lumipat sa swimming noong 2014 para lamang magpababa ng timbang.

Matapos ang dalawang taon na pagsasanay ay nagbunga ang pinaghirapan ni Batnag nang magtampisaw ng limang gintong medalya sa swimming competition ng 2016 Batang Pinoy National Championship sa Davao del Norte Sports and Tourism Complex.

Kumuha ng gold medal ang 12-anyos na Grade 7 student ng Baguio City National High School sa boys’ 12-under 200m backstroke (2:31.26), 200m butterfly (2:30.07), 100m backstroke (1:08.88), 100m butterfly (1:06.76),  200m IM (2:31.08).

“Siyempre po masayang-masaya ako kasi maganda ang naging performance ko rito sa Batang Pinoy,” sabi ni Batnag, pumitas ng tatlong bronze medal sa 200m backstroke, 400m IM at 200m butterfly sa nakaraang 2016 Palarong Pambansa sa Legazpi City, Albay.

Samantala, apat na gintong medalya ang nilangoy nina Janelle Alisa Lin ng Balon Dagupan swimming team sa girls’ 12-under 200m backstroke (2:35.19), 200m freestyle (2:18.17), 200m IM (2:35.87) at 50m freestyle (29.56) at Davao bet Matthieu Adrien Tao sa boys’ 12-under 50m freestyle (28.32), 100m freestyle (1:01.98) at 200m freestyle ( 2:19.84) at sa 200m 4x50 relay (2:00.30).

May tig-tatlo naman sina Christian Paul Amor sa boys’ 13-17 yrs old 200m backstroke (2:20.50), 100m freestyle (55.77) at 100m backstroke (1:3.20) at Mark Jiron Rotoni ng Quezon City sa boys’ 13-17 yrs old 200m breaststroke (2:30.50), 200m IM (2:20.85) at 100m breaststroke ( 1:11.13).

Umagaw naman ng eksena si Eduard Josh Buenavista, anak ni Olympian at Southeast Asian Games 10,000m at 3,000m steeplechase record holder Eduardo Buenavista, nang itakbo ang gintong medalya sa boys’ 5,000m run.

Nagsumite ang 14-an­yos na si Buenavista ng bilis na 16:58.00 para ungusan sina Fernando Reyes (16:59.16) ng La Union at Bernard Paul del Rosario (17:15.96) ng Candon.

Sa archery, tumudla ng tig-tatlong gold medal sina Jonathan Ebbinghan Reaport ng Manila sa cub boys’ 20m, 40m at 144 round at Renato Justine ng General Santos City sa cadet boys’ 30m, 50m at 144 round.

Sa pencak silat, kumuha ng 13 ginto ang Zamboanga City.