Di kabalibad sa seguridad
Mahimong nilampos na ang Presidential Security Group pagkumbinser ni Vice President-elect Leni Robredo sa pagtahan sa iyang naandan nga pagsakay og buses gikan ug padung sa iyang buhatan sa Metro Manila ug sa iyang pinuy-anan sa Naga City sa Camarines Sur. Matod ni Robredo inanay na siyang nakasabot sa mga implikasyon sa iyang seguridad isip ikaduhang labing taas nga opisyal sa nasudnong gobyerno.
Mas lisod pasabton si President-elect Rodrigo Duterte. Kinsa niinsistir nga sa unang mga semana sa iyang pamunoan, gawas nga di siya mopuyo sa Malakanyang, mosakay siya og commercial flights pagpauli matag gabii sa Davao City ug pagbalik sa trabaho matag buntag sa palasyo.
***
Daghang nihangop sa pahibawo ni Duterte nga usa sa mga simbolo nga daghan ug dagkong kausaban ang atong mapaabot sa mosunod nga unom ka tuig sa iyang pamunoan. Angay sang hangpon ang pasalig ni Robredo nga bisan did-an na siya pagsakay og bus magpabilin ang iyang pamilya sa ilang yano nga pagpuyo.
Lisod tinuod sabton nganong dako kaayo ang kabalaka sa seguridad sa duha ka tagduma sa nasud. Nga nakadaog man sila kay maoy gipili sa labing daghan sa mga botante. Pulos sila nipasalig paghimo sa Pilipinas nga mas luwas alang sa tanan, nganong did-an ug gapuson man sila sa paghimo sa mga gimbuhaton natong kasarangang katawhan matag adlaw?
***
Ang dagko nilang katungdanan sa nasud ug sa katawhan, nga mas mahinungdanon kay sa personal nilang kagustohan, maoy labing lig-ong argumento sa paghigpit sa ilang seguridad. Mao nga ang ubang mga lider nga sama nila nisupak sab sa sinugdanan nidawat sa batakang mga lagda sa seguridad.
Kay samtang luwas tinuod ang paglakaw-lakaw sa dan sa kasarangang molupyo, bisan sa risgo nga mabanggaan sa sakyanan nga iresponsable ang drayber o matsambahan sa paregla sa bugoy sa pikas eskina, mas dako ang risgo nilang Duterte ug Robredo kay mas dako ang kawad-on sa nasud ug sa katawhan kon simbako may daotang mahitabo nila.
***
Gawas nilang Duterte ug Robredo, ang PSG mobantay sa mga sakop sa ilang pamilya, mga kanhi presidente ug bise presidente ug ilang pamilya, mga sakop sa gabinete ug ubang opisyal sa Malakanyang ug moduaw nga mga pangu sa ubang kanasuran ug ilang pamilya.
Ang PSG naglakip sa Presidential Escorts, Presidential Guards, Headquarters Service Battalion, Security Battalion, Special Reaction Unit / K9 Unit, PSG Station Hospital, PSG Dental Dispensary, Presidential Intelligence Company, PSG Training School, 11th Mechanized Infantry Company, Presidential Protection Unit, Manila Police District Field Force, Special Action Force, 250th Presidential Airlift Wing, Malacañang Fire Station, 93rd Marine Security Company, AT-25 BRP Ang Pagasa, CGS Pasig, 1st Provisional Company, Presidential Computer and Communication Battalion, 710th Special Operations Wing ug 5th EOD Detachment, PA.
- Latest
