Kalahi ni Duterte
Ang pagsukwahi ni Davao City Mayor Rodrigo Duterte sa mga tradisyon sa iyang pagdagan ug pagdaog sa labing taas nga katungdanan sa nasud, apil nang gitakda niyang pag-isnab sa pormal nga proklamasyon nilang Kongresista Leni Robredo sa National Board of Canvassers (NBOC) karong adlawa, mas masabtan kun lilion:
Di lang ang lahi nga pagduma niya sa Davao City sud sa duha ka dekada, nga nabantang sa tanan kay iyang gipasigarbo sa tibuok nasud ug sa kalibotan;
Kun dili sa iya sang tulo ka tuig nga paglingkod isip kongresista sa unang distrito sa Davao City gikan sa 1998 ngadto sa 2001, nga wa mahibaw-i sa kadaghanan kay wala man sab siya’y ikapanghambog.
***
Bisan sakop si Duterte sa lapad nga alyansa sa politikanhong mga partido nga nipadaog ni kanhi presidente Joseph Estrada sa piniliayng presidensiyal sa 1998, ang Laban ng Makabayang Masang Pilipino (LAMMP), nga mao say nituboy ni kanhi senador Manny Villar isip speaker sa House of Representatives, nisukwahi siya.
Gipaluyohan ni Duterte pagka speaker ang independente apan klarong pildehunon nga si anhing Senador Joker Arroyo. Tungod sa pagpaluyo ni Villar sa impeachment ni Estrada, gipulihan siya sa mayoriya sa mga kongresista nga alyado sa Malakanyang ni Arnulfo Fuentebella. Apan si Duterte nisukwahi na sab sa mayoriya ug nitakli sa iyang suporta ngadtong Villar.
***
Gawas nga mas masabtan nganong sikit silang Villar (usa sa labing una ug labing kontrobersiyal niyang gitudlo sa gabinete maong anak ni Villar pagka kalihim sa Department of Public Works and Highways), malilian sab sa iyang postura sa Kongreso ang:
Di siya mahadlok nga mobatok sa mayoriya alang sa iyang gituohang husto (sama sa pagpalubong ni anhing presidente Ferdinand Marcos sa Libingan ng mga Bayani ug pagpasaylo ni kanhi presidente Gloria Arroyo); ug
Di siya managana pagbangga sa gamhanang mga institusyon alang sa gituohang makaayo sa mas daghan (sama sa iyang pagtunglo sa Simbahang Katoliko ug pagsaad sa hingpit nga pagpatuman sa Reproductive Health Law).
***
Unsaon pagbalanse ni Duterte ang determinasyon pagpatuman sa dagkong kausaban nga iyang gituohang makaayo sa nasud ug sa katawhan ug ang demokratikanhong panginahanglan sa pagkonsulta ug pagpaminaw sa sukwahi nga mga panghunahuna?
Ang di ikapasigarbo nga agi niya sa Kongreso di ang ka-independente sa panghunahuna kun dili ang pagsige og absent sa mga sesyon ug kanihit sa mga balaudnon nga napasar. Way makabasol niya kay daghan man sang way bilib sa Kongreso. Apan hinaut nga mas kugihan ug mas matinud-anon siya sa pagduma sa Malakanyang. Hinaut nga makaamgo nga bisan siya ang labing taas nga opisyal sa kagamhanan di ang tanang gusto maoy matuman. Kun mahitabo na, hinaut nga di siya manglaktod ug mamugos. Ug labaw sa tanan di siya motahan.
- Latest
