Sulbad sa trapiko

Magsugod na karong tuiga ang pagtuon sa kahaom sa gisugyot nga coastal highway nga molatas sa mga dakbayan sa Sugbo ug Mandaue ug mga lungsod sa Consolacion ug Liloan. Gimando ni Kalihim Rogelio Singson sa Department of Public Works and Highways ang feasibility study human nadawat ang pormal nga sugyot ni Kongresista Luigi Qusimbing sa ikaunom nga distrito sa Sugbo.

Matod ni Quisumbing ilang gisugyot sa DPWH nga ang coastal highway magsugod sa South Road Properties, molatas sa kabaybayonan sa Sugbo ug Mandaue, mosuong sa duha ka taytayan sa Mandaue ug Lapu-Lapu ug molahos sa kabaybayonan sa Consolacion ug Liloan sa amihanang Sugbo.

* * *

Si Quisumbing nga niduaw sa Arangkada sa DYAB Abante Pa, Bisaya! niingon nga mahibaw-an human sa pagtuon kon mapatuman bang proyekto. Ug kon mapatuman man, pila ang gasto ug kanus-a kasugdan ug mahuman. Masaligon si Quisumbing nga ang coastal highway makatabang pagsulbad sa kahuot sa trapiko sa Mandaue ug Metro Cebu.

Nipasabot si Quisumbing nga sama sa ikatulong taytayan, nga gitakdang mosumpay sa SRP ug Cordova, ang coastal highway moiban sa mga sakyanan nga moagi sa Mandaue bisan kon kasilinganang mga dakbayan ug kalungsoran ang destinasyon. Nipuno siya nga ang proyekto haom sa gitakdang pagbalhin sa Cebu International Port gikan sa Cebu City ngadto sa Consolacion o Liloan.

* * *

May laing sugyot si Quisumbing pagsulbad sa trapiko sa Mandaue ug kasilinganang mga dapit: Pagtukod og di lang usa kon dili duha gyod ka interchange sa eskina sa Plaridel ug UN Avenue, duol sa baba sa Marcelo Fernan bridge, ug sa eskina duol sa Butuanon bridge.

Kon aprobahan sa DPWH, nangagpas si Quisumbing nga maggamit na gyong North Coastal Road nga alternatibong agianan gikan ug padung sa Mandaue ug amihanang Sugbo. Napanid-ang gilikayan sa mga sakyanan ang coastal road kay kinahanglan pang molibot ilawom sa Marcelo Fernan bridge ug busa na-imbudo lang gihapon ang mas daghang sakyanan sa nasudnong highway sa Mandaue.

* * *

Matod ni Quisumbing ang interchange, nga maglakip sa nagkalainlain nga ramps, o mga ang-ang sa mga agianan, aron nga maglahus-lahos ang magsugat nga mga sakyanan, mas barato ug mas epektibo kay sa gisugyot nga pagpalapad sa taytayan sa Butuanon. Kansang kahagip-ot maoy gibasol nga nakatanggong sa mga sakyanan gikan sa amihanan paingon sa Mandaue ug Cebu City.

Dako ang gasto sa mga proyekto nga gisugyot ni Quisumbing apan masaligon siyang uyonan sa Malakanyang ug sa sunod nga administrasyon. Kay di na lang ni pangandoy, nahimo na gyod nga dinaliang panginahanglan tungod sa paspas nga paglambo sa lokal nga ekonomiya sa Sugbo. Nga nakadani sa mas daghang molupyo ug mas daghan ug mas dagkong sakyanan.