Katuohan ba si Binay?

Si Vice President Jejomar Binay nangangkon nga ang tanan niyang katigayonan nga miabot og kapin P60 milyones base sa iyang gideklarar, nakuha gyud kuno sa legal nga paagi.

Wala maglipud-lipod pagpangutana kang Binay si GMA-7 Radio Anchor Mike Enriquez kon giunsa niya pag-angkon ang minilyon niya nga salapi ug katigayonan.

Ang tubag ni Binay mao nga iyang natigum ang daghan niyang kuwarta ug katigayonan kay abogado man siya, doktora ang iyang asawa, ug may mga negosyo siya.

Ambot og mituo ba kaha ang mga naminaw sa gisulti ni Binay. Samtang, ang Commission on Audit (COA) mopagawas na karong Pebrero sa resulta sa ilang pakisusi sa giingong overpricing pagtukod sa Makati City parking building.

Ang pasangil mao nga gipaburot pag-ayo ang presyo sa pagtukod sa parking building sa Makati City atol nga mayor pa si Binay sa maong siyudad. Gitiwas pagtukod ang maong parking building atol sa termino sa anak ni Binay nga si Junjun Binay, kinsa gi-dismiss sa Ombudsman.

Dili ko motuo nga P60 milyones ra ang kuwarta ug katigayonan ni Binay. Gipangutana siya ni Enriquez kon diin siya og gigasto sa pagpangampanya nga gi-freeze man ang iyang kuwarta? Wala siya makahatag og klarong tubag.

Usa ako sa mibotar kaniadto ni Binay sa pagka bise presidente kay sikat lagi sa Makati. Karon dili gyud maayo nga may mansa ang pagkatawo sa palingkoron nato pagka presidente sa nasud.

Si Mar Roxas nga laing kandidato pagka presidente walay report nga nakahimo og kurapsyon sa daghang katuigan nga nahimo siyang kongresista, senador ug Cabinet secretary, apan ambot nga ang ubang mga tawo dili man gusto niya?

Napanid-an nako nga ang uban gusto man og tawo nga nalambigit og kurapsyon, ug  kanang tawo nga miangkon nga daghan na siya og napatay ug may kabit ug uyab, gawas sa iyang asawa.

Usahay makapanglingo-lingo na lang ko nga maghuna-huna. Ngano kaha? Tungod tingali kay kon subra ra ka buotan ang presidente, dili man niya makontrolar ang iyang mga sakop.

Ang gikuyawan lang gud nako ni Mayor Rodrigo Duterte kon mahimo siya nga presidente, kay sigurado man gyud nga patay dinhi, patay didto ug patay diha.

Maayo lang unta kon ang gipangpatay ang tinuod ra nga drug lord ug pusher, kriminal ug tulisan. Sigurado ko nga ang himabaye, walay labot sa patyonon kay pareho man sila ni Duterte.

Dili kaha moabuso unya ang mga tawo ni Duterte? Basin og ulahi na unya ang atong pagbasol kon ang atong mga kabanay na ang mabiktima.

* * *

Sa survey pagka bise presidente, nag-una gihapon si Senador Chiz Escudero. Si Chiz ang bisita ni Mike Enriquez kagahapon. Dili gyud malalis ang survey nga nag-una si Chiz kay ang tanang pangutana kaniya, pulos natubag nga wala gyud magkanga-kanga. Hasta gud ang kabahin sa sports issue, natubag gihapon niya.

Nagsunod kang Chiz sa survey mao si Bongbong Marcos ug Leni Robredo, dayon si Peter Alan Cayetano. Angay pa gyud sila nga mangampanya pag-ayo. Huwaton nako kon sila ma-interview ni Enriquez nga walay lipud-lipod sa pagpangutana.

* * *

Bisan og gisuspenso siya sa Malacañang, walay hunong si Mayor Michael Rama pagsuroy-suroy. Usahay gud mawani niya si Acting Mayor Edgardo Labella kon mag-abot sila sa usa ka venue.

Gipaabot nga si Rama mobalik na sa iyang opisina karong Pebrero 8, kana   kon walay laing suspenso. Bisan si Rama nagtuo gani nga may moabot na usab nga suspenso kaniya gikan sa Malacañang.

Tungod ning walay hunong nga paglibut-libot ni Rama sa dakbayan bisan og suspendido pa siya, angay'ng dili mokumpiyansa si kanhi Mayor Tomas R. Osmeña nga iyang kontra pagka mayor.

Ang nakabentaha lang ni Tommy kay daghan pa diay nga mga senior citizens nga wala makalimot nga iya kining proyekto kaniadto nga paghatag og cash assistance sa mga tiguwang.

Ang mga Cebu City scholars nakahinumdom usab nga ideya ni Tommy kaniadto ang paghatag og P10,000 nga college scholarship kada semester sa mga mogradwar sa public high school dinhi sa dakbayan.