Hinaot nga mapatuman
Atong masaksihan sa mosunod nga mga adlaw unsa kamatinud-anon ang pamunoan sa Dakbayan sa Sugbo nga mopatuman sa labing bag-o nilang ordinansa: Nga naghatag og gahom sa City Hall pagkanselar sa business permit sa mga negosyante nga mapamatud-ang nibalibad paghatag sa 20% nga diskuwento sa senior citizens ug persons with disabilities.
Malipayong gihangop sa mga Sugbuanon ang pagpirma ni Acting Mayor Edgar Labella sa ordinansa nga napasar sa City Council ubos sa pagpangamahan ni Konsehal Alvin Dizon. Nga usa sa labing laktod ug makiangayong paagi pagsilot sa malapasong mga negosyante. Apan bisan unsa kamaayo sa balaod, magmapuslanon lang kon hingpit nga mapatuman.
***
Sa wa pa ang ordinansa ni Dizon, naglisod ang senior citizens ug PWDs pagpaningil sa benepisyo nga hagbay rang gimando sa balaod. Kay kinahanglan pa sila nga mopasaka og kaso sa korte batok sa mga bay patigayon nga nilapas sa balaod. Dakong bayranan sa mga abogado ug kalangay sa husay tungod sa nagtipun-og nga mga kaso sa mga hukmanan maoy pipila sa nakapabugnaw nila sa pagkiha.
Wa katabang sa ilang kawsa ang kahuyang tungod sa kakuwang sa mga kawani sa Office of the Senior Citizens Affairs nga gimando sa balaod nga tukuron sa matag lungsod ug dakbayan. Gani, daghan pang local government units nga wa pang katukod og OSCA.
***
Ang bag-ong paagi pagpatuman sa benepisyo sa senior citizens ug PWDs gisugyot ni Atty. Ralph Sevilla, kanhi Cebu City Legal Officer, kansang lapad nga kasinatian sa abogasiya ug isip kanhi Human Resource Development Manager sa City Hall nakaaghat niya pagluwat sa sugyot atol sa Kapamilya Seminar Festival uban sa senior citizens sa ABS-CBN TV barn.
Si Dizon nga nakatambong sab sa seminar niadtong Septiyembre sa niaging tuig nipunit sa hagit pagtabang sa senior citizens. Sa pag-umol niya sa ordinansahon ug sa wa pa mopatawag og public hearings, gipalapdan ni Dizon ang coverage aron maapil ang PWDs.
***
Ubos sa ordinansa, yano ra ang himuon sa mga biktima:
•Moreklamo sila sa OSCA ug Persons with Disabilities Affairs Office (PDAO);
•Pahibaw-on sa OSCA ug PDAO ang negosyante sa reklamo batok niya ug hatagan og lugway nga 15 ka adlaw pagtubag;
•Ipahigayon sa OSCA ug PDAO ang clarificatory conference uban sa tabang sa Department of Social Welfare and Services ug City Legal Office;
•Kon kapamatud-an ang kalapasan, hatagan ang negosyante og 15 ka adlaw paghatag sa diskuwento ngadto sa biktima ug kon magdumili pahamtangan na og silot;
•Ang unang kalapasan silotan lang og pasidaan apan ang ikaduha ug mosunod nga kalapasan mahimo nang mosangpot sa pagsuspeno o pagkanselar o di pag-renew sa business permit.
- Latest
