Mayor misakay'g caleza

Dili gyud nato mabasol ang mga kaatbang sa politika ni Mayor Michael Rama nga moisip nga "drama" ang pagsakay niya og tartanilya atol sa pag-inspection niya sa Carbon Public Market kagahapon.

Mahimo ra man gud unta kadto nga maglakaw ra si Mayor Rama apan gituyo man gyud nga magsakay siya'g caleza. Aw hinuon, alang sa mga kontra sa politika ni Mayor Rama, dili gayud ninyo kapugngan ang suspendido nga mayor kon ingon niini ang iyang gimmick.

Kini gud nga mga kandidato, iya-iya man og gimmick aron nga mo-click ang ilang propaganda. Usahay lang hinuon, adunay mga tawo nga anaa sa palibot sa mayor nga palpak sa ilang trabaho ug mahimutang na hinuon nga kataw-anan si Mayor Rama.

Pareho niadtong hulagway nga si Mayor Rama nagtikungkong nga naghigda sa lantay didto sa Carbon Market. Daghang mga tawo nga misaway niadto diha sa social media.

Apan, sagdi na lang, kay kini ra ba'ng mga dumadapig ni Mayor Rama, atakehon dayon ang media nga mohimo og report nga dili maayo alang kanila. Maayo unta og magpaila, magtakuban man sa ilang katalawan.

Bitaw, ang nindot gyud unta kanila ni Mayor Rama ug kanhi Mayor Tomas Osmeña, mag-iyahay sila'g greet og Merry Christmas. Panahon sa pasko, kalimtan usa kadiyot ang panagbangi sa politika.

Unya, iniglapas sa bag-ong tuig, aw, padayon na sab.

* * *

Dunay nakapanglantaw nga kon mahitabo nga ma-disqualify gyud si Senador Grace Poe sa pagdagan pagka presidente sa eleksyon sunod tuig, makabentaha niini si Bise Presidente Binay.

Ang ilang bana-bana mao nga daghan sa mga supporters ni Poe mapugos sa pagsuporta ni Binay. Bisan ang kampo ni Rodrigo Duterte dili gusto nga ma-disqualify si Poe.

Natingala ko niining maong pangagpas sa uban. Sa ato pa, mas gusto sila ni Binay kay ni Roxas? Bisan daghan og mga kasong kurapsyon nga giatubang si Binay, adto gihapon sila mosuporta?

Apan kon ako maoy pangutan-on, lahi ang akong panglantaw kay ang akong bayaw nga gikan sa Manila, kang kansang trabaho mao ang pag-adto sa lainlaing dapit, mitug-an man nga si Roxas maoy kusog didto ug dili si Binay.

Apan sagdi lang, mahibaw-an ra gyud na sa pag-abot na sa eleksyon.

* * *

Pahalipayan nako ang mga sakop sa Cebu Provincial Police Office Intelligence Division nga napatay nila ang drug pusher didto sa lungsod sa San Francisco, Camotes.

Dili man gyud makapangangkon ang kabanayan sa namatay nga gipatay ra ang maong drug pusher, kay makita man nga usa ka polis nasamdan gani.

Unya, adunay KG9 Assault rifle nga nakuha nga diha tupad sa patay'ng lawas. Sus, kon kini pa ang buhaton sa mga sakop sa PDEA, mapuo gyud ang mga drug pusher, apan nagkyugpos ra man sila.

Kamo na lay paghuna-huna diha kon ngano nga panagsa ra makaangkon og kalampusan ang PDEA nga unta sila man maoy suheto niining trabaho pakigbatok sa tigbaligya og drugas.

* * *

Tambag nako sa mga nagpuyo sa dapit nga nasunogan sa Barangay Lahug nga ayaw ninyo supaka ang re-blocking kay pinaagi niana, monindot ang inyong dapit, sama sa Lorega-San Miguel.

Tan-awa ra gud ang karaang menteryo sa Lorega kaniadto nga gipuy-an sa mga squatters, mahadlok ka nga mosulod, dili tungod sa abat o kalag, kun dili, tungod kay hagip-ot kaayo ang agianan.

Human masunog ang maong dapit, gi-reblock sa City Hall ug ang resulta puwerteng nindota na g'yud sa maong dapit. Ang nindot gani gyud mao nga dili na huwaton pa ang sunog nga mahitabo aron mapa-higayon ang reblocking.

Daghang mga dapit dinhi sa dakbayan nga walay access road ug kon may sunog nga moulbo sa sudlonon nga bahin, masunog na lang kini nga dili marespondehan sa mga bombero.

* * *

Buyno, alang sa mga nagsunod sa akong lindog, Malipayong Pasko ug Mauswagong Bag-ong Tuig kaninyong tanan!