Dili mao ang resulta sa survey?

Mura'g tinuod man tingali ang pagduda sa uban nga dili gyud katuohan ang resulta sa giingong survey sa popularity rating sa mga kandidato pagka presidente sa nasud.

Ang akong bayaw nga tua magpuyo sa Manila ug daghan kaayo'g mga kaila nga mga ilado ug mga ordinaryong tawo, mitug-an kanako nga ang "kusog" sa mga botante dili man maoy nag-una sa survey.

Dili kaha posible nga kon kinsa ang mobayad sa pagpahigayon sa survey mao gyud ang mag-una sa lista? Dili imposible no?

Wala ko makatuo sa gitug-an sa akong bayaw nga si kanhi DILG Secretary Mar Roxas hilahihan ka popular didto sa Manila. Nagtuo man gud ko nga si Vice President Binay maoy sikat kay taga Makati gud.

Sa survey sa Social Weather Station nga gihimo kaniadtong Disyembre 12 ngadto sa 14, pareho sila si Binay ug Senador Grace Poe nga mikuha'g 26 porsiyento.

Ikaduha ra si Roxas sa survey nga mikuha og 22 porsiyento, ug dayon gisundan ni Rodrigo Duterte.

Unya sa pagka bise presidente, si Senador Chiz Escudero maoy nag-una, ug nagsunod ra ang ubang vice presidentiables. Kon mao ni, dili na lang diay maayong seryosohon nato ang resulta sa survey.

Ang kauban nako sa Banat News nga si Edwin Melecio dihang nakaadto siya sa Manila, mikunpirmar 'sab nga kusog gyud si Mar Roxas sa mga botante didto, apan lahi man ang mogawas sa survey.

***

Mokiha gyud kuno si suspended mayor Michael Rama ngadto sa mga konsehal sa dakbayan sa Sugbo nga magdumili sa pag-aprobar sa giduso niya nga P2.8 bilyones nga Supplemental Budget No. 1.

Matud ni Rama nga wala siya magkumedya ug iya gyud nga tinud-on ang pagpasaka og kaso. Buyno, makaayo sab ang pagpasaka og kaso kay aron mahibaw-an kon kinsa ang anaa sa husto nga baruganan.

Ang mga konsehal nga alyado sa BOPK mahadlok nga basin og sila ang pabayron sa maong kantidad kon moingon ang Commission on Audit nga illegal ang pagbaligya sa yuta sa SRP, nga ang halin maoy gigamit nga kuhaan sa gasto sa SB-1.

May abogado man gud nga miingon nga wala tumana ang lagda nga "unsolicited proposal" ang matang sa pagbaligya ug dili public bidding.

Makapalibog kining isyuha ngadto sa mga dili suheto kabahin sa isyu sa budget. Huwaton nato kon unsay sangpotanan niini.

Kagahapon, walay mga konsehal sa BOPK nga nanunga sa special session sa City Council mao nga mitakda na usab ang presiding officer nga karon na usab nga hapon, kana kon manunga ang mga konsehal.

* * *

Nakaagi ko kagahapon sa usa ka lotto outlet sa dalan V. Gullas. Akong nabantayan nga dunay usher sa masiao swertres nga hilom usab nga nangisyu og tiket sa kilid.

Grabeha no? Gikumpetensyahan na ang legal nga lotto outlet? Mao kini ang nahitabo sa Cebu Tres, nga gihatagan og pagtugot sa Philippine Charity Sweepstakes Office (PCSO) nga makapamaligya og tiket sa swertres, apan gikumpetensyahan sa mga masiao ushers.

Makapangutana gyud lagi kita ngano nga walay gihimo ang kapolisan batok niining mga masiao swertres nga mikatap na dinhi sa Sugbo? Ang atong direktor sa kapolisan nagkyugpos lang sab ug walay gihimo.

Dakong hagit kini ngadto sa kadagkoan sa City Hall. Kana kon dili sila mahadlok, ilabi na nga nagsingabot ra ba ang eleksyon.

* * *

May nag-text nako ug nagpaila kun tinuod ba kuno nga ang mga tricycle sa Mandaue dili na padaganon kon si Luigi Quisumbing maoy mahimo nga mayor.

Nakabasa diay siya sa atong lindog. Akong giingnan nga ang mga tricycle usa sa naka-contribute sa kahuot sa kadalanan diha sa Mandaue ug si Quisumbing nagnegosyo og mga multicab.

Dili imposible nga kon modaog siya, usa sa paagi pagsulbad sa trapiko nga wala masulbad ni Mayor Jonas Cortes, mao ang pag-ilis sa mga tricycle og multicab.