Kalig-on ni de Lima
Way makakuwestiyon sa katuyhad sa lahutay ni kanhi Justice Secretary Leila de Lima tungod sa iyang paghimo sa mosunod:
• Pagpapriso niya ni kanhi presidente Gloria Macapagal-Arroyo niadtong higayon nga gikontrolar pa sa iyang mga tinudlo ug mga itoy ang hapit tanang mahinungdanong buhatan sa gobyerno;
• Pagsukol niya ni kanhi chief justice Renato Corona niadtong higayon nga iya pang gigawongan ang Korte Suprema ug wa pa mapresentar ang mga ebidensiya sa mga pasangil sa pangurakot ug pag-abuso sa gahom; ug
• Pagpapriso niya sa tulo ka labing inila ug gamhanan nga lider sa oposisyon nga ang mga senador nga silang Juan Ponce Enrile, Jinggoy Estrada ug Bong Revilla.
***
Nisibaw ang mga pagsaway batok ni de Lima sa gamhanang mga interes nga iyang naligsan. Gipasanginlan siyang niinsulto sa labawng hukmanan ug gihulga nga sagpaon og contempt ug pasakaan og mga kasong kriminal ug administratiba tungod sa giingong mapangahason niyang pagyatak sa batakang balaod.
Naabsuwelto si de Lima sa tanang kaso. Apan tungod sa kaso nga giatol gyod og pasaka sa Korte Suprema samtang nag-ung-ong ang iyang nominasyon sa Judicial and Bar Council nahikawan si de Lima sa talagsaong kahigayonan nga mahimo untang bag-ong chief justice, puli unta ni Corona malampusong na-impeach sa House of Representatives ug nakonbikto sa impeachment trial sa Senado.
***
Niangkon si de Lima nga gisakitan siya sa nawagtang nga kahigayonan nga matudlo sa Korte Suprema. Apan nitataw nga bilib siya sa pasiunang kausaban nga gipasiugdahan sa natudlo nga si Chief Justice Ma. Lourdes Sereno. Gi-am-aman na lang ang iyang kaugalingon nga mahimong di mohaom ang iyang personalidad sa korte.
Kon lisod ang pagpasaka og kaso batok sa mga lider sa oposisyon, mas lisod alang ni de Lima ang pagkiha sa mga alyado sa administrasyon nga naapil sa pork barrel scandal. Masaligon hinuon siyang nakasabot silang kanhi Customs commissioner Ruffy Biazon, kanhi TESDA director general Joel Villanueva ug ubang mga alyado nga igo lang niyang gisubay ang mga ebidensiya.
***
Atol sa iyang pagtambong sa Arangkada sa DYAB Abante Pa, Bisaya! gahapon sa buntag, gidawat ni de Lima nga usa sa nakapasulbong sa popularidad ni Davao City Mayor Rodrigo Duterte mao ang kahimangod sa katawhan sa gitumbok nga kahinay ug kakurakot sa sistema sa hustisya.
Gitataw ni de Lima nga determinado siyang mokumbinser sa katawhan nga di ang laktod nga hustisya ni Duterte ang gikinahanglan. Nipasalig nga kon makalingkod sa Senado mas determinado siyang maningkamot nga matapakan ang daghan ug dagko uyamot nga mga buslot sa sistema--gikan sa kapolisan, prosekusyon, hukmanan, prisohan ug katilingban. Matod niya samtang nagmalampuson na ang pasiunang mga paningkamot pagdugang og prosecutors, mga maghuhukom ug mga hukmanan, daghan pa ang gikinahanglang himuon.
- Latest
