Maka-TRO ba si Rama?
Giisip na karon sa suspendidong si Cebu City Mayor Mike Rama nga silot ug di lang preventive suspension ang iyang pagkatangtang sa katungdanan sa mosunod nga duha ka buwan. Nausab ang orihinal niyang panagang nga wa siya mapamatud-ing sad-an sa kasong administratiba nga gipasaka batok niya apan gisuspenso lang aron nga di makaguba sa mga ebidensiya ni makahulga sa mga saksi.
Sa iyang pagtawag sa Arangkada sa DYAB Abante Pa, Bisaya! gahapon sa buntag, gitataw nang Rama nga wa nay kapuslanan ang preventive suspension kay nasumiter nang tanang ebidensiya sa kontrobersiya ngadto sa Malakanyang. Subli siyang nipasangil nga politikanhong pagpanggukod ang nahitabo niya.
***
Sayop hinuon ang pasumbingay ni Rama nga gibukubuko siya sa Department of Interior and Local Government kay gisuspenso siya sa samang adlaw nga gitugotan siyang makabiyahe ngadto sa Paris pagtambong sa Climate Change Summit:
•Una, nahatag ang pagtugot sa DILG sa iyang opisyal nga biyahe sa Pransiya pila ka adlaw sa wa pa ang aktuwal niyang biyahe niadtong Disyembre 2; ug
•Ikaduha, ang nipirma niadtong Disyembre 2 sa preventive suspension order batok niya mao si Executive Secretary Paquito Ochoa Jr., nga naila nang di alyado ni kanhi DILG Secretary Mar Roxas, ug naabtan og pila ka adlaw una napadangat ngadto sa ulohang buhatan sa DILG nga igo lang gitahasan sa pagpatuman.
***
Naglaom si Atty. Mikel Rama, anak ug abogado ni Mayor Rama, nga makakuha sila og temporary restraining order gikan sa Court of Appeals. Bisan sa pahimangno nga wa mabantog ang CA sa kapaspas paghusay sa mga kaso, gitataw ni Atty. Rama nga masaligon silang makakuha og hustisya gikan sa CA Cebu Station.
Mahimong usa sa mga sukaranan sa iyang kamasaligon mao ang mga taho nga usa sa mga mahistrado sa division sa CA nga natugpahan sa petisyon sa iyang amahan kauban sa law school ni Acting Cebu City Mayor Edgar Labella. Wa hinuoy nakit-an nga panginahanglan ang tanang hingtungdan sa pagpa-inhibit niya.
***
Matod ni Presiding Justice Gabriel Ingles sa CA Cebu Station di kapasanginlan si Justice Ed Delos Santos nga may dapigan tungod lang kay kauban sa law school ni Labella nga di maoy sinumbong sa kaso. Ubang mga tigpaniid niisip pa ganing Labella nga maoy labing nakapahimus sa pagkasuspenso ni Rama.
Bisan ang abogado ni Labangon Barangay Captain Vic Buendia, kansang kaso maoy nakapasuspenso ni Rama, wa mabalaka kon tinuod mang suod si Delos Santos sa kampo ni Rama. Matod ni Atty. Ben Militar gawas sa kalig-on sa ilang mga ebidensiya ang Office of the Solicitor General maoy mobarug sa pagpanalipod sa ka-lehitimo sa pagsuspenso sa buhatan ni Presidente Noynoy Aquino sud sa 60 ka adlaw ni Rama.
- Latest
