Bongga nga pinaskohan

Dako ra gyud kaayo ang P30,000 nga bonus nga gisugyot ni Mayor Michael Rama sa matag kawani sa Cebu City Hall. Una pa kining higayon nga ingon niini kadako ang kantidad nga madawat sa mga kawani isip bonus.

Tinuod, daghan og kuwarta ang dakbayan gikan sa buhis ug halin sa kayutaan, apan rason na ba kini nga hatagan niya og dagko nga kantidad ang mga kawani?

Dili makalikay si Mayor Rama sa pagduda sa iyang mga kritiko nga may sagol pamolitika kining iyang pagsugyot og dakong kantidad. Ang P127 milyones nga gastohon sa paghatag og bonus, daghan na unta kaayo nga proyekto para sa katawhan.

Mahibulong man gud ang katawhan kay ang mayor dili man bongga kon manghatag og pinaskohan nga gigastoan og kuwarta nga gikan sa iyang bulsa.

* * *      

Gisundan nako kanunay ang mga isyu nga naglambigit sa mga tawo nga nagtinguha nga sila ang mapili pagka presidente sa nasud human sa eleksyon karong sunod tuig.

Bisan og 130 ka tawo ang gusto nga mapiling presidente, apan lima ra man gyud kanila ang maisip nato nga angayang hisgotan kay ang kadaghanan maisip ra nga "nuisance."

Kanilang lima, si Vice President Jejomar Binay ra man ang nag-atubang og isyu sa pangurakot og kuwarta sa kagamhanan diha nga mayor pa siya sa Makati City. Wala pa hinuon siya mamatud-i nga sad-an.

Ang uban dunay mga isyu apan dili pangurakot. Sama ni kanhi DILG Secretary Mar Roxas nga ang isyu mao ra gyud nga kuno dili kaayo magpa-interview sa media sa iyang pagbisita sa lainlaing dapit sa nasud.

Dili kuno hingatawa si Roxas. Tinuod, bisan ako, wala makagusto nga si Roxas molikay usahay sa media kay wala man unta siya malambigit og anomaliya.

Ang isyu ni Senador Grace Poe kay wala pa makatuman sa requirement nga kinahanglang 10 ka tuig na ang iyang pagpuyo sa nasud atol sa adlaw sa eleksyon, mao nga gi-disqualify siya sa Comelec.

Ikaduha, maisip nga hilaw pa si Poe. Mas maayo pa lagi ang iyang katandem nga si Senador Chiz Escudero kay suheto pa kay kang Grace Poe mao nga miingon ko nga mas nindot nga magbaylo sila og daganan.

Unya daghan sab ang nahadlok kang Mayor Rodrigo Duterte tungod sa iyang batasan. Samtang adunay uban nga ganahan sa iyang estelo nga pamatyon ang mga badlongon, duna say daghan nga wala makagusto, ilabi na sa iyang pagkahimalikas.

Kuyaw bitaw, sayonan ka kon may magbutang-butang nga ikaw drug pusher, matiklo ta og walay oras. Unya si Senador Miriam Santiago, aw, makamao man, pero bisan unsaon dili gyud makadaog.

Kon basehan ang kasinatian unya kanang wala malambigit og kurapsyon, si Mar Roxas ra gyud ang modaog. Apan ang katawhan maoy motimbang-timbang kon kinsa ang ilang padag-on.

* * *

Gisaway ang grupo ni Kongresista Luigi Quisumbing ug Carlo Fortuna kay, mga pilionon pagka mayor ug bise mayor sa Mandaue, kay nangampanya sila mga kawani sa Mandaue nga nagpahigayon og tax mapping seminar niadtong Nobiyembre 19.

Kompleto ang ilang line-up nga misulod sa tigum. Nakasabot ko nga miatraka na lang gyud si Luigi kay ang iyang gisulod teritoryo man sa iyang kontra nga si Konsehal Lolypop Ouano-Dizon nga maoy ikaatbang ni Luigi.

Sipa kaayo ang mga kumentarista sa radyo nga misaway sa gihimo sa grupo ni Luigi. Pasagdi lang na ninyo uy, ayaw na lang na og hatagi og dakong bili kay anha maila ang tukmang pamatasan sa tawo.

Unya, hapit na ang Disyembre 10 nga maoy kataposang adlaw nga si Mayor Jonas Cortes makatakli pagdagan isip bise mayor diin siya usa ka "sure winner."

Mao kini ang gipaabot nga kalamboan sa politika diha sa Mandaue ug hangpon sa mga tawo. Bisan ako, mosuporta niini kay aron makatabang gihapon si Jonas pagsulbad sa grabeng problema sa trapiko diha sa Mandaue.