Kalaay sa kaligdong

Kon imong mahinabi si Aika Robredo, di kang kapugong paghinumdom sa namatay niyang amahan nga si kanhi Interior Secretary Jesse Robredo ug sa iyang inahan nga si Kongresista  Leni Robredo.  Ang kalma niyang tingog, ang tuno sa iyang sinultihan ug ang kamaayo niyang mopasabot,  sa  way paghisgot  sa  maanyag niyang panagway, magpaila sa iyang mga ginikanan.

Sa una ug bisan sa ikaduha nakong pakighinabi ni Kongresista Robredo, wa dayon kong kabantay nga managsama sila og sinultihan sa namatay niyang bana. Pagkadungog nakong Aika, diha na ko nakamatikod nga mahimong ang tibuok diay nilang pamilya managsama og sinultihan. Ug ang kasulundon ni Aika mopalili nato sa kaligdong sa iyang mga ginikanan.

* * *

Unang nakit-an si Aika sa nasudnong telebisyon dihang gipangita pa ang iyang amahan human nihagsa ang gisakyang ayroplano sa kadagatan sa Masbate niadtong Agosto 2012. Ang iyang kakalma ug katarung nakadani dayon sa nasud ug sa katawhan nga nangaliya ug nagbangotan uban nila.

Hingpit nga gitahud ang ilang privacy nga karon pa nahibaw-i sa kadaghanan ang pipila ka mahinungdanong kasayuran sa ilang pamilya. Sa iyang pagduaw sa Arangkada sa DYAB Abante Pa, Bisaya! sa niaging buwan, among nahibaw-an nga nagtrabaho diay siya isip inhinyero sa Office of Civil Defense (OCD). Apan niluwat na sa katungdanan aron makatabang sa kampanya sa iyang inahan pagka bise presidente.

* * *

Bisan mayor nang iyang amahan sa Naga City dihang nakamatngon siya og buot, wa kahinumdom si Aika nga natental siya pagdemanda og espesyal nga pagtagad. Matod niya ang yanong pagpuyo sa ilang mga ginikanan nakatudlo nila nga di sila labaw sa kasarangang mga molupyo.

Bisan manuroy sila sa shopping malls, nakit-an nilang mga anak nga di luho ang ilang mga ginikanan. Kinsa wa sab magkuwang pagpahinumdom nila nga di angayng magwaldas kay wa man silay sobrang kuwarta nga usik-usikan. Maong nanagko sila nga wa magharab-harab pagpangayo sa matag gawas sa bag-ong gadgets ug mga duwaan.

* * *

Ang katarung sa ilang pamilya mapuslanon sa kampanya apan, ug akong giprangkahan silang Aika ug inahan ini, mahimong modasig sa mga botante nga manghuy-ab. Kay samtang nahimong sumsoman sud sa pila ka adlaw ang mga balikas ni Davao City Mayor Rodrigo Duterte, way nagtuki giunsa sa mga Robredo pagsalikway ang dagkong tentasyon sa pangurakot sa politika ug giunsa pagmatuto ang ilang mga bata.

Wa maluya si Aika nga nagpabiling ubos ang ratings sa iyang inahan kon itandi sa mas unang nakapahibawo sa ilang kandidatura. Usa sa mga pagtulon-an nga ilang nasunod sa mga kampanya sa iyang amahan mao nga ang daghang kuwarta ug mas abundang pamakak sa ilang mga kaatbang labing epektibong masagang sa makugihon ug mapailubong pagpasabot sa matinud-anong tinguha pag-alagad kon ituboy sa katungdanan.